ਵਿਰਾਟ ਕੋਹਲੀ ਦੀ NETWORTH 1000 ਕਰੋੜ ਤੋਂ ਪਾਰ, ਇੰਸਟਾਗ੍ਰਾਮ ‘ਤੇ ਪ੍ਰਤੀ ਪੋਸਟ ਕਮਾਉਂਦਾ ਹੈ 8.9 ਕਰੋੜ

ਕੋਹਲੀ ਦੇ ਮੁੰਬਈ ਅਤੇ ਗੁਰੂਗ੍ਰਾਮ ‘ਚ ਘਰ ਹਨ। ਮੁੰਬਈ ‘ਚ ਘਰ ਦੀ ਕੀਮਤ 34 ਕਰੋੜ ਅਤੇ ਗੁਰੂਗ੍ਰਾਮ ‘ਚ ਘਰ ਦੀ ਕੀਮਤ 80 ਕਰੋੜ ਹੈ।

ਵਿਰਾਟ ਕੋਹਲੀ ਦੇ ਕ੍ਰਿਕਟ ਵਿਚ ਜਿਥੇ ਰਨ ਵੱਧ ਰਹੇ ਹਨ, ਉਥੇ ਹੀ ਰੋਜ਼ ਉਨ੍ਹਾਂ ਦੀ ਜਾਇਦਾਦ ਵਿਚ ਵੀ ਵਾਧਾ ਹੋ ਰਿਹਾ ਹੈ। ਵਿਰਾਟ ਕੋਹਲੀ ਦੀ ਜਾਇਦਾਦ 1000 ਕਰੋੜ ਰੁਪਏ ਨੂੰ ਪਾਰ ਕਰ ਗਈ ਹੈ। ਇਹ ਖੁਲਾਸਾ ਸਟਾਕ ਗਰੋ ਕੰਪਨੀ ਨੇ 34 ਸਾਲਾ ਕੋਹਲੀ ਦੀ ਕੁੱਲ ਜਾਇਦਾਦ ਨੂੰ ਲੈ ਕੇ ਕੀਤਾ ਹੈ। ਰਿਪੋਰਟ ਮੁਤਾਬਕ ਇੰਸਟਾਗ੍ਰਾਮ ‘ਤੇ 253 ਮਿਲੀਅਨ (25 ਕਰੋੜ 30 ਲੱਖ) ਫਾਲੋਅਰਜ਼ ਦੇ ਨਾਲ ਕੋਹਲੀ ਦੀ ਕੁੱਲ ਜਾਇਦਾਦ 1050 ਕਰੋੜ ਰੁਪਏ ਹੋ ਗਈ ਹੈ। ਭਾਰਤੀ ਕ੍ਰਿਕਟ ਕੰਟਰੋਲ ਬੋਰਡ (BCCI) ਨੇ ਸਾਬਕਾ ਭਾਰਤੀ ਕਪਤਾਨ ਕੋਹਲੀ ਨੂੰ ‘A+’ ਸ਼੍ਰੇਣੀ ‘ਚ ਜਗ੍ਹਾ ਦਿੱਤੀ ਹੈ। ਕੋਹਲੀ ਨੂੰ ਬੀਸੀਸੀਆਈ ਤੋਂ ਇਕਰਾਰਨਾਮੇ ਤਹਿਤ ਸਾਲਾਨਾ 7 ਕਰੋੜ ਰੁਪਏ ਮਿਲਦੇ ਹਨ।

ਇਸ ਤੋਂ ਇਲਾਵਾ ਬੀਸੀਸੀਆਈ ਉਸਨੂੰ ਟੈਸਟ ਲਈ 15 ਲੱਖ, ਵਨਡੇ ਲਈ 6 ਲੱਖ ਅਤੇ ਟੀ-20 ਮੈਚ ਖੇਡਣ ਲਈ 3 ਲੱਖ ਰੁਪਏ ਦਿੰਦਾ ਹੈ। ਕੋਹਲੀ ਇੰਡੀਅਨ ਪ੍ਰੀਮੀਅਰ ਲੀਗ (IPL) ਟੀਮ ਰਾਇਲ ਚੈਲੰਜਰਜ਼ ਬੈਂਗਲੁਰੂ (RCB) ਦਾ ਹਿੱਸਾ ਹੈ। ਆਰਸੀਬੀ ਉਸਨੂੰ 15 ਕਰੋੜ ਰੁਪਏ ਸਾਲਾਨਾ ਅਦਾ ਕਰਦਾ ਹੈ। ਕੋਹਲੀ ਦੇ ਮੁੰਬਈ ਅਤੇ ਗੁਰੂਗ੍ਰਾਮ ‘ਚ ਘਰ ਹਨ। ਮੁੰਬਈ ‘ਚ ਘਰ ਦੀ ਕੀਮਤ 34 ਕਰੋੜ ਅਤੇ ਗੁਰੂਗ੍ਰਾਮ ‘ਚ ਘਰ ਦੀ ਕੀਮਤ 80 ਕਰੋੜ ਹੈ।

ਕੋਹਲੀ ਕੋਲ 31 ਕਰੋੜ ਰੁਪਏ ਦੀਆਂ ਲਗਜ਼ਰੀ ਕਾਰਾਂ ਦਾ ਭੰਡਾਰ ਹੈ। ਸੋਸ਼ਲ ਮੀਡੀਆ ਦੀ ਗੱਲ ਕਰੀਏ ਤਾਂ ਕੋਹਲੀ ਇੰਸਟਾਗ੍ਰਾਮ ‘ਤੇ ਇਕ ਪੋਸਟ ਲਈ 8.9 ਕਰੋੜ ਰੁਪਏ ਲੈਂਦੇ ਹਨ। ਜਦੋਂ ਕਿ ਟਵਿੱਟਰ ‘ਤੇ ਉਹ ਪ੍ਰਤੀ ਪੋਸਟ 2.5 ਕਰੋੜ ਰੁਪਏ ਲੈਂਦੇ ਹਨ। ਕੋਹਲੀ ਦੇ ਆਪਣੇ ਇੰਸਟਾਗ੍ਰਾਮ ਅਕਾਊਂਟ ‘ਤੇ 25 ਕਰੋੜ (253 ਮਿਲੀਅਨ) ਤੋਂ ਵੱਧ ਫਾਲੋਅਰਜ਼ ਹਨ। ਇੰਸਟਾਗ੍ਰਾਮ ਅਕਾਊਂਟ ‘ਤੇ ਇੰਨੇ ਜ਼ਿਆਦਾ ਫਾਲੋਅਰਜ਼ ਰੱਖਣ ਵਾਲੇ ਉਹ ਪਹਿਲੇ ਏਸ਼ੀਆਈ ਖਿਡਾਰੀ ਵੀ ਹਨ। ਕੋਹਲੀ ਬਰਾਂਡ ਐਂਡੋਰਸਮੈਂਟ ਤੋਂ ਕਰੋੜਾਂ ਰੁਪਏ ਸਾਲਾਨਾ ਕਮਾ ਲੈਂਦੇ ਹਨ। ਕੋਹਲੀ ਕ੍ਰਿਕਟ ਤੋਂ ਜਿੰਨੀ ਕਮਾਈ ਕਰਦੇ ਹਨ, ਉਸ ਤੋਂ ਚਾਰ ਗੁਣਾ ਐਡੋਰਸਮੈਂਟ, ਬ੍ਰਾਂਡ ਐਂਡੋਰਸਮੈਂਟ ਅਤੇ ਸਟਾਰਟਅੱਪਸ ਤੋਂ ਵੀ ਪੈਸਾ ਕਮਾਉਂਦੇ ਹਨ। ਉਸਨੇ ਸੱਤ ਸਟਾਰਟਅੱਪਸ ਵਿੱਚ ਨਿਵੇਸ਼ ਕੀਤਾ ਹੈ, ਜਿਸ ਵਿੱਚ ਬਲੂ ਟ੍ਰਾਇਬ, ਯੂਨੀਵਰਸਲ ਸਪੋਰਟਸਬਿਜ਼, ਐਮਪੀਐਲ ਅਤੇ ਸਪੋਰਟਸ ਕਾਨਵੋ ਸ਼ਾਮਲ ਹਨ। ਉਹ 18 ਤੋਂ ਵੱਧ ਬ੍ਰਾਂਡਾਂ ਦੇ ਇਸ਼ਤਿਹਾਰ ਵੀ ਕਰਦੇ ਹਨ। ਕੋਹਲੀ ਹਰ ਇਸ਼ਤਿਹਾਰ ਲਈ 7.50 ਤੋਂ 10 ਕਰੋੜ ਰੁਪਏ ਸਾਲਾਨਾ ਫੀਸ ਵੀ ਲੈਂਦੇ ਹਨ।