ਮਰਾਠਾ ਰਾਖਵਾਂਕਰਨ ਅੰਦੋਲਨ ਹੋਇਆ ਹਿੰਸਕ, ਮਰਾਠਾ ਰਾਖਵਾਂਕਰਨ ਦੇ ਸਮਰਥਨ ‘ਚ ਇਕ ਦਿਨ ‘ਚ 9 ਲੋਕਾਂ ਨੇ ਕੀਤੀ ਖੁਦਕੁਸ਼ੀ

ਅੰਦੋਲਨ ਦੇ ਆਗੂ ਮਨੋਜ ਜਾਰੰਗੇ ਨੇ ਕਿਹਾ ਕਿ ਉਹ ਅੱਧਾ ਨਹੀਂ ਸਗੋਂ ਪੂਰਾ ਰਾਖਵਾਂਕਰਨ ਲੈਣਗੇ। ਕੋਈ ਵੀ ਤਾਕਤ ਆ ਜਾਵੇ, ਮਹਾਰਾਸ਼ਟਰ ਦੇ ਮਰਾਠੇ ਨਹੀਂ ਰੁਕਣਗੇ। ਸੀਐਮ ਏਕਨਾਥ ਸ਼ਿੰਦੇ ਨੇ ਕਿਹਾ ਕਿ ਮਰਾਠਾ ਭਾਈਚਾਰਾ ਬਹੁਤ ਸ਼ਾਂਤਮਈ ਢੰਗ ਨਾਲ ਅੰਦੋਲਨ ਕਰਦਾ ਹੈ, ਸਰਕਾਰ ਇਸ ਗੱਲ ‘ਤੇ ਧਿਆਨ ਦੇ ਰਹੀ ਹੈ ਕਿ ਕੌਣ ਤੋੜਫੋੜ ਅਤੇ ਅੱਗਜ਼ਨੀ ਕਰ ਰਿਹਾ ਹੈ।

ਮਹਾਰਾਸ਼ਟਰ ‘ਚ ਮਰਾਠਾ ਰਾਖਵਾਂਕਰਨ ਅੰਦੋਲਨ ਹਿੰਸਕ ਰੂਪ ਲੈਂਦਾ ਜਾ ਰਿਹਾ ਹੈ। ਮਹਾਰਾਸ਼ਟਰ ‘ਚ ਮਰਾਠਾ ਰਾਖਵਾਂਕਰਨ ਦੀ ਮੰਗ ਨੂੰ ਲੈ ਕੇ ਮੰਗਲਵਾਰ ਨੂੰ ਇਕ ਔਰਤ ਸਮੇਤ 9 ਹੋਰ ਲੋਕਾਂ ਨੇ ਖੁਦਕੁਸ਼ੀ ਕਰ ਲਈ। 19 ਤੋਂ 31 ਅਕਤੂਬਰ ਤੱਕ 13 ਦਿਨਾਂ ਵਿੱਚ ਹੁਣ ਤੱਕ 26 ਵਿਅਕਤੀ ਖੁਦਕੁਸ਼ੀ ਕਰ ਚੁੱਕੇ ਹਨ। ਇਸ ਸਾਲ ਸਤੰਬਰ ਵਿੱਚ ਸ਼ੁਰੂ ਹੋਇਆ ਅੰਦੋਲਨ 8 ਤੋਂ ਵੱਧ ਜ਼ਿਲ੍ਹਿਆਂ ਵਿੱਚ ਹਿੰਸਕ ਰੂਪ ਧਾਰਨ ਕਰ ਚੁੱਕਾ ਹੈ।

ਮਹਾਰਾਸ਼ਟਰ ਦੇ ਬੀਡ ਵਿੱਚ 30 ਅਕਤੂਬਰ ਨੂੰ ਹੋਈ ਹਿੰਸਕ ਘਟਨਾਵਾਂ ਤੋਂ ਬਾਅਦ ਹਿੰਸਾ ਦੀ ਅੱਗ ਹੁਣ ਮੁੰਬਈ ਤੱਕ ਪਹੁੰਚ ਗਈ ਹੈ। ਦੋ ਅਣਪਛਾਤੇ ਲੋਕਾਂ ਨੇ ਬੁੱਧਵਾਰ ਸਵੇਰੇ ਕੋਲਾਬਾ ਖੇਤਰ ਵਿੱਚ ਵਿਧਾਇਕਾਂ ਦੀ ਸਰਕਾਰੀ ਰਿਹਾਇਸ਼ ਦੇ ਸਾਹਮਣੇ ਮਹਾਰਾਸ਼ਟਰ ਦੇ ਮੈਡੀਕਲ ਸਿੱਖਿਆ ਮੰਤਰੀ ਹਸਨ ਮੁਸ਼ਰਿਫ ਦੇ ਕਾਫਲੇ ਦੀ ਗੱਡੀ ਦੀ ਭੰਨਤੋੜ ਕੀਤੀ। ਪੁਲਿਸ ਨੇ 3 ਲੋਕਾਂ ਨੂੰ ਗ੍ਰਿਫਤਾਰ ਕਰ ਲਿਆ ਹੈ।

ਮੰਗਲਵਾਰ ਨੂੰ ਹੀ ਮੁੱਖ ਮੰਤਰੀ ਏਕਨਾਥ ਸ਼ਿੰਦੇ ਦੀ ਪ੍ਰਧਾਨਗੀ ‘ਚ ਹੋਈ ਮੰਤਰੀ ਮੰਡਲ ਦੀ ਬੈਠਕ ‘ਚ ਜਸਟਿਸ ਸੰਦੀਪ ਸ਼ਿੰਦੇ ਕਮੇਟੀ ਦੀ ਅੰਤ੍ਰਿਮ ਰਿਪੋਰਟ ਨੂੰ ਮਨਜ਼ੂਰੀ ਦਿੱਤੀ ਗਈ। ਹਾਲਾਂਕਿ ਸਰਕਾਰ ਨੇ ਭੁੱਖ ਹੜਤਾਲ ‘ਤੇ ਬੈਠੇ ਮਨੋਜ ਜਾਰੰਗੇ ਪਾਟਿਲ ਦੀ ਸਾਰੇ ਮਰਾਠਿਆਂ ਨੂੰ ਰਾਖਵਾਂਕਰਨ ਦੇਣ ਦੀ ਮੰਗ ਨੂੰ ਠੁਕਰਾ ਦਿੱਤਾ। ਦੂਜੇ ਪਾਸੇ ਅੰਦੋਲਨ ਦੇ ਆਗੂ ਮਨੋਜ ਜਾਰੰਗੇ ਨੇ ਚਿਤਾਵਨੀ ਦਿੱਤੀ ਹੈ ਕਿ ਅੰਦੋਲਨ ਦੇਸ਼ ਭਰ ਵਿੱਚ ਫੈਲ ਜਾਵੇਗਾ। ਜਾਰੰਗੇ ਨੇ ਮੰਗਲਵਾਰ ਨੂੰ ਕਿਹਾ ਸੀ ਕਿ ਸਰਕਾਰ ਬੁੱਧਵਾਰ ਨੂੰ ਹੀ ਵਿਸ਼ੇਸ਼ ਸੈਸ਼ਨ ਬੁਲਾ ਕੇ ਰਿਜ਼ਰਵੇਸ਼ਨ ‘ਤੇ ਫੈਸਲਾ ਲਵੇ, ਨਹੀਂ ਤਾਂ ਮੈਂ ਪਾਣੀ ਛੱਡ ਦੇਵਾਂਗਾ।

ਅੰਦੋਲਨ ਦੇ ਆਗੂ ਮਨੋਜ ਜਾਰੰਗੇ ਨੇ ਕਿਹਾ ਕਿ ਉਹ ਅੱਧਾ ਨਹੀਂ ਸਗੋਂ ਪੂਰਾ ਰਾਖਵਾਂਕਰਨ ਲੈਣਗੇ। ਕੋਈ ਵੀ ਤਾਕਤ ਆ ਜਾਵੇ, ਮਹਾਰਾਸ਼ਟਰ ਦੇ ਮਰਾਠੇ ਨਹੀਂ ਰੁਕਣਗੇ। ਵਿਧਾਇਕਾਂ ਅਤੇ ਸੰਸਦ ਮੈਂਬਰਾਂ ਨੂੰ ਰਿਜ਼ਰਵੇਸ਼ਨ ਮਿਲਣ ਤੱਕ ਮੁੰਬਈ ਵਿੱਚ ਹੀ ਰਹਿਣਾ ਚਾਹੀਦਾ ਹੈ। ਸੀਐਮ ਏਕਨਾਥ ਸ਼ਿੰਦੇ ਨੇ ਕਿਹਾ ਕਿ ਮਰਾਠਾ ਭਾਈਚਾਰਾ ਬਹੁਤ ਸ਼ਾਂਤਮਈ ਢੰਗ ਨਾਲ ਅੰਦੋਲਨ ਕਰਦਾ ਹੈ, ਸਰਕਾਰ ਇਸ ਗੱਲ ‘ਤੇ ਧਿਆਨ ਦੇ ਰਹੀ ਹੈ ਕਿ ਕੌਣ ਭੜਕਾਹਟ ਅਤੇ ਅੱਗਜ਼ਨੀ ਕਰ ਰਿਹਾ ਹੈ। ਮਨਸੇ ਪ੍ਰਧਾਨ ਰਾਜ ਠਾਕਰੇ ਨੇ ਮਨੋਜ ਜਾਰੰਗੇ ਪਾਟਿਲ ਨੂੰ ਪੱਤਰ ਲਿਖ ਕੇ ਵਰਤ ਛੱਡਣ ਲਈ ਕਿਹਾ ਹੈ। ਉਨ੍ਹਾਂ ਕਿਹਾ ਕਿ ਜਿਸ ਮੰਗ ਲਈ ਤੁਸੀਂ ਮਰਨ ਵਰਤ ਰੱਖ ਰਹੇ ਹੋ, ਉਸ ਨਾਲ ਸਿਆਸਤਦਾਨਾਂ ਦਾ ਕੋਈ ਲੈਣਾ-ਦੇਣਾ ਨਹੀਂ ਹੈ।