ਪੁਤਿਨ ਰਾਸ਼ਟਰਪਤੀ ਬਣਨ ਦੇ 9 ਦਿਨਾਂ ਦੇ ਅੰਦਰ ਚੀਨ ਪਹੁੰਚੇ, ਚੀਨੀ ਰਾਸ਼ਟਰਪਤੀ ਨੇ ਕਿਹਾ ਸਾਡੀ ਦੋਸਤੀ ਦੁਨੀਆ ਵਿੱਚ ਸਥਿਰਤਾ ਲਿਆਉਂਦੀ ਹੈ

ਕਤਰ ਦੇ ਨਿਊਜ਼ ਚੈਨਲ ਅਲਜਜ਼ੀਰਾ ਮੁਤਾਬਕ ਪੁਤਿਨ ਆਪਣੀ ਯਾਤਰਾ ਦੌਰਾਨ ਯੂਕਰੇਨ ਯੁੱਧ ‘ਚ ਚੀਨ ਤੋਂ ਲਗਾਤਾਰ ਸਮਰਥਨ ਦੀ ਮੰਗ ਕਰਨਗੇ।

ਚੀਨ ਅਤੇ ਰੂਸ ਦੀ ਦੋਸਤੀ ਜਗਜਾਹਿਰ ਹੈ ਅਤੇ ਦੋਂਵਾਂ ਦੇਸ਼ਾਂ ਦੇ ਨੇਤਾ ਸਮੇਂ ਸਮੇਂ ‘ਤੇ ਇਸਦਾ ਜਿਕਰ ਕਰ ਚੁਕੇ ਹਨ। ਵਲਾਦੀਮੀਰ ਪੁਤਿਨ ਪੰਜਵੀਂ ਵਾਰ ਰੂਸ ਦੇ ਰਾਸ਼ਟਰਪਤੀ ਬਣਨ ਤੋਂ ਬਾਅਦ ਵੀਰਵਾਰ ਨੂੰ ਚੀਨ ਪਹੁੰਚ ਗਏ। ਉਨ੍ਹਾਂ ਨੇ ਚੀਨ ਦੇ ਰਾਸ਼ਟਰਪਤੀ ਸ਼ੀ ਜਿਨਪਿੰਗ ਨਾਲ ਮੁਲਾਕਾਤ ਕੀਤੀ। ਦੋ-ਪੱਖੀ ਬੈਠਕ ਤੋਂ ਬਾਅਦ ਪ੍ਰੈੱਸ ਕਾਨਫਰੰਸ ਦੌਰਾਨ ਦੋਵਾਂ ਨੇਤਾਵਾਂ ਨੇ ਅਮਰੀਕਾ ਦੀ ਆਲੋਚਨਾ ਕੀਤੀ।

ਰੂਸ ਨੇ ਅਮਰੀਕਾ ‘ਤੇ ਪ੍ਰਮਾਣੂ ਸੰਤੁਲਨ ਨੂੰ ਵਿਗਾੜਨ ਦੀ ਕੋਸ਼ਿਸ਼ ਕਰਨ ਦਾ ਦੋਸ਼ ਲਾਇਆ। ਇਸ ਤੋਂ ਇਲਾਵਾ ਦੋਵਾਂ ਨੇਤਾਵਾਂ ਨੇ ਰੂਸ ਅਤੇ ਚੀਨ ਵਿਚਾਲੇ ਰੱਖਿਆ ਭਾਈਵਾਲੀ ਵਧਾਉਣ ‘ਤੇ ਸਹਿਮਤੀ ਜਤਾਈ। ਜਿਨਪਿੰਗ ਨੇ ਕਿਹਾ ਕਿ ਯੂਕਰੇਨ ਜੰਗ ਨੂੰ ਸਿਆਸੀ ਸਮਝੌਤੇ ਰਾਹੀਂ ਹੱਲ ਕੀਤਾ ਜਾਣਾ ਚਾਹੀਦਾ ਹੈ। ਰੂਸ ਅਤੇ ਚੀਨ ਦੀ ਦੋਸਤੀ ਵਿਸ਼ਵ ਵਿੱਚ ਸਰਵਉੱਚਤਾ ਲਈ ਚੱਲ ਰਹੀ ਲੜਾਈ ਵਿੱਚ ਸਥਿਰਤਾ ਲਿਆਉਣ ਲਈ ਕੰਮ ਕਰਦੀ ਹੈ। ਇਸ ਦੇ ਨਾਲ ਹੀ ਪੁਤਿਨ ਨੇ ਯੂਕਰੇਨ ਯੁੱਧ ਨੂੰ ਖਤਮ ਕਰਨ ਲਈ ਚੀਨ ਦੇ ਯਤਨਾਂ ਲਈ ਧੰਨਵਾਦ ਕੀਤਾ। ਉਸਨੇ ਚੀਨ ਨੂੰ ਰੂਸ ਵਿੱਚ ਆਪਣੀਆਂ ਕਾਰਾਂ ਬਣਾਉਣ ਦਾ ਸੱਦਾ ਦਿੱਤਾ।

ਪੁਤਿਨ ਰਾਸ਼ਟਰਪਤੀ ਬਣਨ ਦੇ 9 ਦਿਨਾਂ ਦੇ ਅੰਦਰ ਇਹ ਦੌਰਾ ਕਰ ਰਹੇ ਹਨ, ਉਹ ਵੀ ਅਜਿਹੇ ਸਮੇਂ ਜਦੋਂ ਰੂਸੀ ਫੌਜ ਯੂਕਰੇਨ ਦੇ ਖਾਰਕਿਵ ਸ਼ਹਿਰ ਵਿੱਚ ਦਾਖਲ ਹੋ ਰਹੀ ਹੈ। ਪੁਤਿਨ 2 ਦਿਨ ਤੱਕ ਚੀਨ ‘ਚ ਰਹਿਣਗੇ। ਚੀਨ ਪਹੁੰਚਣ ‘ਤੇ ਰਾਸ਼ਟਰਪਤੀ ਸ਼ੀ ਜਿਨਪਿੰਗ ਨੇ ਪੁਤਿਨ ਦਾ ਰੈੱਡ ਕਾਰਪੇਟ ‘ਤੇ ਸਵਾਗਤ ਕੀਤਾ। ਇਸ ਦੌਰਾਨ ਸੋਵੀਅਤ ਦੌਰ ਦੀਆਂ ਧੁਨਾਂ ਵਜਾਈਆਂ ਗਈਆਂ। ਕਤਰ ਦੇ ਨਿਊਜ਼ ਚੈਨਲ ਅਲਜਜ਼ੀਰਾ ਮੁਤਾਬਕ ਪੁਤਿਨ ਆਪਣੀ ਯਾਤਰਾ ਦੌਰਾਨ ਯੂਕਰੇਨ ਯੁੱਧ ‘ਚ ਚੀਨ ਤੋਂ ਲਗਾਤਾਰ ਸਮਰਥਨ ਦੀ ਮੰਗ ਕਰਨਗੇ।