ਕੇਸੀਆਰ ਨੇ ਜੋ ਵੀ ਪੈਸਾ ਚੋਰੀ ਕੀਤਾ ਕਾਂਗਰਸ ਵਾਪਸ ਕਰੇਗੀ, ਤੇਲੰਗਾਨਾ ਦੀਆਂ ਔਰਤਾਂ ਦੇ ਖਾਤਿਆਂ ‘ਚ ਭੇਜਾਂਗੇ 2500 ਰੁਪਏ : ਰਾਹੁਲ ਗਾਂਧੀ

ਰਾਹੁਲ ਗਾਂਧੀ ਨੇ ਕਿਹਾ ਕਿ ਜੇਕਰ ਤੇਲੰਗਾਨਾ ‘ਚ ਕਾਂਗਰਸ ਦੀ ਸਰਕਾਰ ਬਣੀ ਤਾਂ ਔਰਤਾਂ ਦੇ ਬੈਂਕ ਖਾਤਿਆਂ ‘ਚ ਹਰ ਮਹੀਨੇ 2500 ਰੁਪਏ ਭੇਜੇ ਜਾਣਗੇ। ਰਾਹੁਲ ਗਾਂਧੀ ਨੇ ਕਿਹਾ ਕਿ 1000 ਰੁਪਏ ਦਾ ਸਿਲੰਡਰ 500 ਰੁਪਏ ਵਿੱਚ ਮਿਲੇਗਾ।

ਰਾਹੁਲ ਗਾਂਧੀ ਤੇਲੰਗਾਨਾ ‘ਚ ਇਕ ਤੋਂ ਬਾਅਦ ਇਕ ਰੈਲਿਆਂ ਕਰ ਰਹੇ ਹਨ। ਕਾਂਗਰਸ ਸਾਂਸਦ ਰਾਹੁਲ ਗਾਂਧੀ ਤੇਲੰਗਾਨਾ ਦੇ ਚੋਣ ਦੌਰੇ ‘ਤੇ ਹਨ। ਅੱਜ ਉਨ੍ਹਾਂ ਨੇ ਅੰਬਤਪੱਲੀ ‘ਚ ਇਕ ਜਨ ਸਭਾ ਨੂੰ ਸੰਬੋਧਨ ਕੀਤਾ। ਇਸ ਦੌਰਾਨ ਰਾਹੁਲ ਨੇ ਕਿਹਾ ਕਿ ਸੂਬੇ ਦੇ ਮੁੱਖ ਮੰਤਰੀ ਕੇਸੀਆਰ ਵੱਲੋਂ ਜਨਤਾ ਤੋਂ ਜਿੰਨਾ ਪੈਸਾ ਚੋਰੀ ਕੀਤਾ ਗਿਆ ਹੈ, ਕਾਂਗਰਸ ਉਨਾ ਪੈਸਾ ਸਾਰਿਆਂ ਨੂੰ ਵਾਪਸ ਕਰੇਗੀ।

ਰਾਹੁਲ ਗਾਂਧੀ ਨੇ ਕਿਹਾ- ਔਰਤਾਂ ਸੂਬੇ ਦਾ ਭਵਿੱਖ ਸੰਭਾਲਦੀਆਂ ਹਨ। ਸਾਡੇ ਬੱਚਿਆਂ ਦੀ ਦੇਖਭਾਲ ਕਰਦੀਆਂ ਹਨ। ਤੇਲੰਗਾਨਾ ‘ਚ ਕਾਂਗਰਸ ਦੀ ਸਰਕਾਰ ਬਣੀ ਤਾਂ ਔਰਤਾਂ ਦੇ ਬੈਂਕ ਖਾਤਿਆਂ ‘ਚ ਹਰ ਮਹੀਨੇ 2500 ਰੁਪਏ ਭੇਜੇ ਜਾਣਗੇ। ਰਾਹੁਲ ਗਾਂਧੀ ਨੇ ਕਿਹਾ ਕਿ 1000 ਰੁਪਏ ਦਾ ਸਿਲੰਡਰ 500 ਰੁਪਏ ਵਿੱਚ ਮਿਲੇਗਾ। ਔਰਤਾਂ ਸਰਕਾਰੀ ਬੱਸਾਂ ਵਿੱਚ ਮੁਫ਼ਤ ਸਫ਼ਰ ਕਰ ਸਕਣਗੀਆਂ। ਉਨ੍ਹਾਂ ਦੇ ਸਫ਼ਰ ਲਈ 500 ਤੋਂ 1000 ਰੁਪਏ ਦੀ ਬਚਤ ਹੋਵੇਗੀ। ਇਸ ਤਰ੍ਹਾਂ ਔਰਤਾਂ ਨੂੰ ਹਰ ਮਹੀਨੇ 4000 ਰੁਪਏ ਦਾ ਲਾਭ ਮਿਲੇਗਾ।

ਇਸ ਤੋਂ ਪਹਿਲਾਂ ਬੁੱਧਵਾਰ ਨੂੰ ਵੀ ਰਾਹੁਲ ਨੇ ਮੁੱਖ ਮੰਤਰੀ ਕੇਸੀਆਰ ‘ਤੇ ਹਮਲਾ ਬੋਲਿਆ ਸੀ। ਕਲਵਕੁਰਤੀ ‘ਚ ਜਨ ਸਭਾ ਨੂੰ ਸੰਬੋਧਨ ਕਰਦੇ ਹੋਏ ਕਾਂਗਰਸ ਨੇਤਾ ਨੇ ਕਿਹਾ- ਮੈਂ ਨਰਿੰਦਰ ਮੋਦੀ ਨਹੀਂ ਹਾਂ। ਜਦੋਂ ਮੈਂ ਕੋਈ ਵਾਅਦਾ ਕਰਦਾ ਹਾਂ, ਮੈਂ ਉਸ ਨੂੰ ਪੂਰਾ ਕਰਦਾ ਹਾਂ। ਭਾਜਪਾ ਆਗੂ ਇੱਥੇ ਆ ਕੇ ਕਹਿੰਦੇ ਹਨ ਕਿ ਅਸੀਂ ਓਬੀਸੀ ਮੁੱਖ ਮੰਤਰੀ ਬਣਾਵਾਂਗੇ। ਹੇ ਭਾਈ, ਇੱਥੇ ਤੁਹਾਨੂੰ 2% ਵੋਟਾਂ ਮਿਲਣਗੀਆਂ, ਤੁਸੀਂ ਮੁੱਖ ਮੰਤਰੀ ਕਿਵੇਂ ਬਣੋਗੇ। ਕੇਸੀਆਰ ਪਹਿਲਾਂ ਮੁੱਖ ਮੰਤਰੀ ਦੇ ਅਹੁਦੇ ਨੂੰ ਬਾਏ-ਬਾਏ ਕਹਿਣਗੇ, ਫਿਰ ਉਨ੍ਹਾਂ ਤੋਂ ਜਨਤਾ ਤੋਂ ਲੁੱਟੇ ਗਏ ਪੈਸੇ ‘ਤੇ ਸਵਾਲ ਪੁੱਛੇ ਜਾਣਗੇ।

ਰੈਲੀ ਨੂੰ ਸੰਬੋਧਨ ਕਰਦੇ ਹੋਏ ਰਾਹੁਲ ਨੇ ਕਿਹਾ- ਤੇਲੰਗਾਨਾ ਦੇ ਮੁੱਖ ਮੰਤਰੀ ਕੇਸੀਆਰ ਦੀ ਪਾਰਟੀ ਬੀਆਰਐਸ ਨੇ ਓਵੈਸੀ ਦੀ ਪਾਰਟੀ ਏਆਈਐਮਆਈਐਮ ਨਾਲ ਗਠਜੋੜ ਕੀਤਾ ਹੈ। ਭਾਜਪਾ ਏਆਈਐਮਆਈਐਮ ਦੇ ਉਮੀਦਵਾਰਾਂ ਨੂੰ ਚੋਣਾਂ ਲੜਨ ਲਈ ਪੈਸੇ ਦਿੰਦੀ ਹੈ। ਜਿੱਥੇ ਵੀ ਕਾਂਗਰਸ ਪਾਰਟੀ ਚੋਣ ਲੜਦੀ ਹੈ। ਉੱਥੇ ਭਾਜਪਾ ਏਆਈਐਮਆਈਐਮ ਦੀ ਮਦਦ ਕਰਦੀ ਹੈ।

ਰਾਹੁਲ ਗਾਂਧੀ ਨੇ ਕਿਹਾ ਕਿ ਅਸੀਂ ਸੁਪਨਾ ਦੇਖਿਆ ਸੀ ਕਿ ਤੇਲੰਗਾਨਾ ਦੇ ਲੋਕ ਇਸ ਰਾਜ ‘ਤੇ ਰਾਜ ਕਰਨ, ਪਰ ਪਿਛਲੇ 10 ਸਾਲਾਂ ਤੋਂ ਤੇਲੰਗਾਨਾ ਦੇ ਲੋਕਾਂ ‘ਤੇ ਸਿਰਫ਼ ਇਕ ਪਰਿਵਾਰ ਹੀ ਰਾਜ ਕਰ ਰਿਹਾ ਹੈ। ਇਹ ਪਰਿਵਾਰ ਮੁੱਖ ਮੰਤਰੀ ਦਾ ਹੈ। ਕੇਸੀਆਰ ਸਰਕਾਰ ਨੇ ਕਾਲੇਸ਼ਵਰਮ ਪ੍ਰੋਜੈਕਟ ਦੇ ਨਾਂ ‘ਤੇ ਸੂਬੇ ਦੇ ਲੋਕਾਂ ਤੋਂ 1 ਲੱਖ ਕਰੋੜ ਰੁਪਏ ਦੀ ਚੋਰੀ ਕੀਤੀ ਹੈ।