ਬੰਗਲਾਦੇਸ਼ ‘ਚ ਪ੍ਰਦਰਸ਼ਨਕਾਰੀਆਂ ਨੇ ਮੈਟਰੋ ਨੂੰ ਸਾੜਿਆ ਤਾਂ ਰੋ ਪਈ ਸ਼ੇਖ ਹਸੀਨਾ, ਕਿਹਾ- ਇਹੋ ਜਿਹੀ ਮਾਨਸਿਕਤਾ ਨਾਲ ਦੇਸ਼ ਬਰਬਾਦ ਹੋ ਜਾਵੇਗਾ

ਸੋਸ਼ਲ ਮੀਡੀਆ ‘ਤੇ ਲੋਕ ਸ਼ੇਖ ਹਸੀਨਾ ਦੇ ਹੰਝੂਆਂ ਨੂੰ ‘ਮਗਰਮੱਛ ਦੇ ਹੰਝੂ’ ਕਹਿ ਰਹੇ ਹਨ। ਲੋਕਾਂ ਨੇ ਸਵਾਲ ਉਠਾਇਆ ਕਿ ਪ੍ਰਧਾਨ ਮੰਤਰੀ ਨੇ ਵਿਰੋਧ ਪ੍ਰਦਰਸ਼ਨ ‘ਚ ਮਾਰੇ ਗਏ ਲੋਕਾਂ ਅਤੇ ਉਨ੍ਹਾਂ ਦੇ ਪਰਿਵਾਰਾਂ ਲਈ ਓਨਾ ਦੁੱਖ ਨਹੀਂ ਪ੍ਰਗਟਾਇਆ ਜਿੰਨਾ ਉਨ੍ਹਾਂ ਨੇ ਮੈਟਰੋ ਸਟੇਸ਼ਨ ‘ਚ ਹੋਏ ਨੁਕਸਾਨ ਲਈ ਕੀਤਾ ਹੈ।

ਬੰਗਲਾਦੇਸ਼ ‘ਚ ਪ੍ਰਦਰਸ਼ਨਕਾਰੀਆਂ ਦਾ ਹਿੰਸਕ ਪ੍ਰਦਰਸ਼ਨ ਜਾਰੀ ਹੈ। ਬੰਗਲਾਦੇਸ਼ ਦੀ ਪ੍ਰਧਾਨ ਮੰਤਰੀ ਸ਼ੇਖ ਹਸੀਨਾ ਨੇ ਰਾਖਵਾਂਕਰਨ ਵਿਰੋਧੀ ਹਿੰਸਕ ਪ੍ਰਦਰਸ਼ਨਾਂ ਤੋਂ ਬਾਅਦ ਹੋਏ ਨੁਕਸਾਨ ਨੂੰ ਦੇਖਣ ਲਈ ਮੀਰਪੁਰ-10 ਮੈਟਰੋ ਸਟੇਸ਼ਨ ਦਾ ਦੌਰਾ ਕੀਤਾ। ਇਸ ਦੌਰਾਨ ਮੈਟਰੋ ਸਟੇਸ਼ਨ ‘ਤੇ ਹੋਈ ਭੰਨਤੋੜ ਨੂੰ ਦੇਖ ਕੇ ਸ਼ੇਖ ਹਸੀਨਾ ਰੋ ਪਈ। ਸ਼ੇਖ ਹਸੀਨਾ ਟਿਸ਼ੂ ਪੇਪਰ ਨਾਲ ਆਪਣੇ ਹੰਝੂ ਪੂੰਝਦੀ ਨਜ਼ਰ ਆਈ। ਮੈਟਰੋ ਸਟੇਸ਼ਨ ਦੀ ਹਾਲਤ ਦੇਖ ਕੇ ਹਸੀਨਾ ਨੇ ਕਿਹਾ ਕਿ ਆਮ ਲੋਕਾਂ ਦੀ ਸਹੂਲਤ ਲਈ ਬਣਾਏ ਗਏ ਸਿਸਟਮ ਨੂੰ ਕੋਈ ਕਿਵੇਂ ਵਿਗਾੜ ਸਕਦਾ ਹੈ। ਕਿਹੜੀ ਮਾਨਸਿਕਤਾ ਹੈ ਜੋ ਉਨ੍ਹਾਂ ਨੂੰ ਅਜਿਹੇ ਕੰਮ ਕਰਨ ਲਈ ਮਜਬੂਰ ਕਰਦੀ ਹੈ?

ਪੀਐਮ ਨੇ ਅੱਗੇ ਕਿਹਾ ਕਿ ਢਾਕਾ ਸ਼ਹਿਰ ਟ੍ਰੈਫਿਕ ਜਾਮ ਤੋਂ ਪ੍ਰੇਸ਼ਾਨ ਸੀ। ਮੈਟਰੋ ਬਣਦਿਆਂ ਹੀ ਲੋਕਾਂ ਨੂੰ ਰਾਹਤ ਮਿਲੀ ਸੀ, ਪਰ ਹੁਣ ਇਹ ਖੰਡਰ ਹੋ ਚੁੱਕੀ ਹੈ। ਮੈਂ ਇਸਨੂੰ ਬਰਦਾਸ਼ਤ ਨਹੀਂ ਕਰ ਸਕਦੀ ਹਾਂ। ਉਨ੍ਹਾਂ ਦੇ ਇਸ ਬਿਆਨ ਨੇ ਫਿਰ ਲੋਕਾਂ ਦਾ ਗੁੱਸਾ ਭੜਕਾਇਆ। ਸ਼ੇਖ ਹਸੀਨਾ ਦੀ ਰੋਂਦੀ ਹੋਈ ਤਸਵੀਰ ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੋ ਰਹੀ ਹੈ ਜਿਸ ‘ਚ ਉਨ੍ਹਾਂ ਨੂੰ ਟ੍ਰੋਲ ਕੀਤਾ ਜਾ ਰਿਹਾ ਹੈ।

ਸੋਸ਼ਲ ਮੀਡੀਆ ‘ਤੇ ਲੋਕ ਸ਼ੇਖ ਹਸੀਨਾ ਦੇ ਹੰਝੂਆਂ ਨੂੰ ‘ਮਗਰਮੱਛ ਦੇ ਹੰਝੂ’ ਕਹਿ ਰਹੇ ਹਨ। ਲੋਕਾਂ ਨੇ ਸਵਾਲ ਉਠਾਇਆ ਕਿ ਪ੍ਰਧਾਨ ਮੰਤਰੀ ਨੇ ਵਿਰੋਧ ਪ੍ਰਦਰਸ਼ਨ ‘ਚ ਮਾਰੇ ਗਏ ਲੋਕਾਂ ਅਤੇ ਉਨ੍ਹਾਂ ਦੇ ਪਰਿਵਾਰਾਂ ਲਈ ਓਨਾ ਦੁੱਖ ਨਹੀਂ ਪ੍ਰਗਟਾਇਆ ਜਿੰਨਾ ਉਨ੍ਹਾਂ ਨੇ ਮੈਟਰੋ ਸਟੇਸ਼ਨ ‘ਚ ਹੋਏ ਨੁਕਸਾਨ ਲਈ ਕੀਤਾ ਹੈ। ਉਨ੍ਹਾਂ ਪੁੱਛਿਆ ਕਿ ਸ਼ੇਖ ਹਸੀਨਾ ਨੇ ਵਿਦਿਆਰਥੀਆਂ ਦੀ ਮੌਤ ‘ਤੇ ਹੰਝੂ ਕਿਉਂ ਨਹੀਂ ਵਹਾਏ।