ਚੀਨ ਦੀ ਜੇਲ ‘ਚ ਬੰਦ ਆਸਟ੍ਰੇਲੀਆਈ ਪੱਤਰਕਾਰ ਨੇ ਲਿਖੀ ਚਿੱਠੀ, ਕਿਹਾ- ‘ਸਾਲ ‘ਚ ਸਿਰਫ 10 ਘੰਟੇ ਹੀ ਧੁੱਪ ਦੇਖਣ ਨੂੰ ਮਿਲਦੀ ਹੈ’

ਚੇਂਗ ਲੇਈ ਦੀ ਗ੍ਰਿਫਤਾਰੀ ਅਜਿਹੇ ਸਮੇਂ ‘ਚ ਹੋਈ, ਜਦੋਂ ਚੀਨ-ਆਸਟ੍ਰੇਲੀਆ ਸਬੰਧ ਖਰਾਬ ਦੌਰ ‘ਚੋਂ ਲੰਘ ਰਹੇ ਸਨ। ਆਸਟ੍ਰੇਲੀਆ ਦੇ ਵਿਦੇਸ਼ ਮੰਤਰੀ ਪੈਨੀ ਵੋਂਗ ਨੇ ਕਿਹਾ ਕਿ ਪੂਰਾ ਦੇਸ਼ ਚਾਹੁੰਦਾ ਹੈ ਕਿ ਚੇਂਗ ਲੇਈ ਨੂੰ ਰਿਹਾਅ ਕੀਤਾ ਜਾਵੇ ਅਤੇ ਉਹ ਆਪਣੇ ਬੱਚਿਆਂ ਕੋਲ ਵਾਪਸ ਜਾਵੇ ।

ਚੀਨ ਦੀ ਗਿਣਤੀ ਦੁਨੀਆਂ ਦੇ ਸਭ ਤੋਂ ਖਤਰਨਾਕ ਦੇਸ਼ਾਂ ਵਿਚ ਕੀਤੀ ਜਾਂਦੀ ਹੈ। ਚੀਨ ਦੀ ਜੇਲ ‘ਚ ਬੰਦ ਆਸਟ੍ਰੇਲੀਆਈ ਪੱਤਰਕਾਰ ਚੇਂਗ ਲੇਈ ਯਿਰਨ ਨੇ ਇੱਕ ਦਿਲ ਨੂੰ ਛੂਹ ਲੈਣ ਵਾਲੀ ਚਿੱਠੀ ਲਿਖੀ ਹੈ, ਜੋ ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੋ ਰਹੀ ਹੈ। ਚੇਂਗ ਲੇਈ ਨੇ ਲਿਖਿਆ ਕਿ ਉਹ ਬੱਚਿਆਂ ਨੂੰ ਬਹੁਤ ਯਾਦ ਕਰਦੀ ਹੈ ਅਤੇ ਖੁੱਲ੍ਹੇ ਅਸਮਾਨ ਹੇਠ ਧੁੱਪ ਵਿੱਚ ਬੈਠਣਾ ਚਾਹੁੰਦੀ ਹੈ।

ਤੁਹਾਨੂੰ ਦੱਸ ਦੇਈਏ ਕਿ ਚੇਂਗ ਲੇਈ ਚੀਨੀ ਮੂਲ ਦੀ ਇੱਕ ਆਸਟ੍ਰੇਲੀਆਈ ਪੱਤਰਕਾਰ ਹੈ, ਜੋ ਚੀਨ ਵਿੱਚ ਕੈਦ ਹੈ। ਤਿੰਨ ਸਾਲ ਪਹਿਲਾਂ ਉਹ ਰਹੱਸਮਈ ਹਾਲਾਤਾਂ ਵਿੱਚ ਗਾਇਬ ਹੋ ਗਈ ਸੀ ਅਤੇ ਬਾਅਦ ਵਿੱਚ ਪਤਾ ਲੱਗਾ ਕਿ ਉਹ ਚੀਨ ਦੀ ਜੇਲ੍ਹ ਵਿੱਚ ਬੰਦ ਸੀ। ਚੇਂਗ ਲੇਈ ਨੇ ਜੇਲ ਤੋਂ ਆਪਣੇ ਸਾਥੀ ਨਿਕ ਕੁਲੀ ਨੂੰ ਚਿੱਠੀ ਲਿਖੀ ਹੈ, ਜਿਸਨੂੰ ਨਿਕ ਨੇ ਸੋਸ਼ਲ ਮੀਡੀਆ ‘ਤੇ ਪੋਸਟ ਕੀਤਾ ਹੈ। ਚੇਂਗ ਲੇਈ ਦਾ ਇਹ ਪੱਤਰ ਸੋਸ਼ਲ ਮੀਡੀਆ ‘ਤੇ ਵਾਇਰਲ ਹੋ ਰਿਹਾ ਹੈ। ਚਿੱਠੀ ‘ਚ ਚੇਂਗ ਲੇਈ ਨੇ ਲਿਖਿਆ ਕਿ ‘ਮੇਰੀ ਕੋਠੜੀ ‘ਚ ਸੂਰਜ ਦੀ ਰੌਸ਼ਨੀ ਸਿਰਫ ਖਿੜਕੀ ‘ਚੋਂ ਹੀ ਆਉਂਦੀ ਹੈ, ਪਰ ਮੈਂ ਸਾਲ ‘ਚ ਸਿਰਫ 10 ਘੰਟੇ ਹੀ ਧੁੱਪ ‘ਚ ਰਹਿ ਸਕਦੀ ਹਾਂ।

ਚੇਂਗ ਲੇਈ ਨੇ ਲਿਖਿਆ ਕਿ ਪਿਛਲੇ ਤਿੰਨ ਸਾਲਾਂ ਤੋਂ ਉਸ ਨੇ ਕੋਈ ਦਰੱਖਤ, ਝਾੜੀਆਂ ਜਾਂ ਬੀਚ ਨਹੀਂ ਦੇਖਿਆ। ਉਸਨੇ ਦੱਸਿਆ ਕਿ ਸਾਲ ਵਿੱਚ ਸਿਰਫ਼ ਇੱਕ ਵਾਰ ਹੀ ਉਸ ਦਾ ਬਿਸਤਰਾ ਖੁੱਲ੍ਹੀ ਹਵਾ ਵਿੱਚ ਡਾਇਆ ਜਾਂਦਾ ਹੈ। ਚੇਂਗ ਨੇ ਕਿਹਾ ਕਿ ਉਹ ਆਪਣੀ ਬੱਚੀ ਨੂੰ ਯਾਦ ਕਰਦੀ ਹੈ। ਤੁਹਾਨੂੰ ਦੱਸ ਦੇਈਏ ਕਿ ਸਾਲ 2020 ਵਿੱਚ ਚੀਨੀ ਸਰਕਾਰ ਨੇ ਚੀਨ ਦੇ ਸਰਕਾਰੀ ਟੀਵੀ CGTN ਦੀ ਸਾਬਕਾ ਐਂਕਰ ਚੇਂਗ ਲੇਈ ਨੂੰ ਹਿਰਾਸਤ ਵਿੱਚ ਲਿਆ ਸੀ। ਹਾਲਾਂਕਿ ਚੀਨੀ ਸਰਕਾਰ ਨੇ ਅਧਿਕਾਰਤ ਤੌਰ ‘ਤੇ ਚੇਂਗ ਦੀ ਗ੍ਰਿਫਤਾਰੀ 2021 ਤੋਂ ਦਿਖਾਈ ਹੈ।

ਚੇਂਗ ਲੇਈ ‘ਤੇ ਖੁਫੀਆ ਜਾਣਕਾਰੀ ਲੀਕ ਕਰਨ ਦਾ ਦੋਸ਼ ਹੈ। ਹਾਲਾਂਕਿ ਜਾਣਕਾਰੀ ਦੇ ਸਬੰਧ ‘ਚ ਜ਼ਿਆਦਾ ਵਿਸਤ੍ਰਿਤ ਜਾਣਕਾਰੀ ਨਹੀਂ ਦਿੱਤੀ ਗਈ ਹੈ। ਚੇਂਗ ਲੇਈ ਦੀ ਗ੍ਰਿਫਤਾਰੀ ਅਜਿਹੇ ਸਮੇਂ ‘ਚ ਹੋਈ ਹੈ, ਜਦੋਂ ਚੀਨ-ਆਸਟ੍ਰੇਲੀਆ ਸਬੰਧ ਖਰਾਬ ਦੌਰ ‘ਚੋਂ ਲੰਘ ਰਹੇ ਸਨ। ਆਸਟ੍ਰੇਲੀਆ ਦੇ ਵਿਦੇਸ਼ ਮੰਤਰੀ ਪੈਨੀ ਵੋਂਗ ਨੇ ਕਿਹਾ ਕਿ ਪੂਰਾ ਦੇਸ਼ ਚਾਹੁੰਦਾ ਹੈ ਕਿ ਚੇਂਗ ਲੇਈ ਨੂੰ ਰਿਹਾਅ ਕੀਤਾ ਜਾਵੇ ਅਤੇ ਉਹ ਆਪਣੇ ਬੱਚਿਆਂ ਕੋਲ ਵਾਪਸ ਜਾਵੇ । ਵੋਂਗ ਨੇ ਕਿਹਾ ਕਿ ਅਸੀਂ ਚੇਂਗ ਅਤੇ ਉਸਦੇ ਪਰਿਵਾਰ ਦਾ ਸਮਰਥਨ ਕਰਨਾ ਜਾਰੀ ਰੱਖਾਂਗੇ। ਵੋਂਗ ਨੇ ਕਿਹਾ ਕਿ ਪਿਛਲੇ ਮਹੀਨੇ ਆਸੀਆਨ ਸੰਮੇਲਨ ਦੌਰਾਨ ਉਨ੍ਹਾਂ ਨੇ ਚੀਨੀ ਵਿਦੇਸ਼ ਮੰਤਰੀ ਦੇ ਸਾਹਮਣੇ ਚੇਂਗ ਲੇਈ ਦੀ ਰਿਹਾਈ ਦਾ ਮੁੱਦਾ ਚੁੱਕਿਆ ਸੀ।