29 ਅਗਸਤ ਨੂੰ ਆਵੇਗੀ 100% ਈਥਾਨੋਲ ਨਾਲ ਚੱਲਣ ਵਾਲੀ ਕਾਰ, ਕੇਂਦਰੀ ਮੰਤਰੀ ਨਿਤਿਨ ਗਡਕਰੀ ਨੇ ਕੀਤਾ ਐਲਾਨ

ਨਿਤਿਨ ਗਡਕਰੀ ਨੇ ਕਿਹਾ ਕਿ ਤੇਲ ਦਰਾਮਦ ‘ਤੇ 16 ਲੱਖ ਕਰੋੜ ਰੁਪਏ ਖਰਚ ਹੁੰਦੇ ਹਨ, ਇਸ ਈਂਧਨ ਨਾਲ ਪੈਟਰੋਲੀਅਮ ਦਰਾਮਦ ‘ਤੇ ਹੋਣ ਵਾਲੇ ਖਰਚ ਨੂੰ ਬਚਾਇਆ ਜਾ ਸਕਦਾ ਹੈ। ਜੇਕਰ ਅਸੀਂ ਆਤਮ-ਨਿਰਭਰ ਬਣਨਾ ਹੈ ਤਾਂ ਤੇਲ ਦੀ ਦਰਾਮਦ ਨੂੰ ਜ਼ੀਰੋ ‘ਤੇ ਲਿਆਉਣਾ ਹੋਵੇਗਾ।

ਨਿਤਿਨ ਗਡਕਰੀ ਅਜਿਹੇ ਨੇਤਾ ਹਨ, ਜਿਨ੍ਹਾਂ ਦੀ ਗੱਲ ਨੂੰ ਪੱਖ ਅਤੇ ਵਿਪੱਖ ਦੋਂਵੇ ਪਾਸਿਆਂ ਦੇ ਲੋਕਾਂ ਵਲੋਂ ਧਿਆਨ ਨਾਲ ਸੁਣਿਆ ਜਾਂਦਾ ਹੈ। ਕੇਂਦਰੀ ਸੜਕੀ ਆਵਾਜਾਈ ਅਤੇ ਰਾਜਮਾਰਗ ਮੰਤਰੀ ਨਿਤਿਨ ਗਡਕਰੀ 29 ਅਗਸਤ ਨੂੰ 100% ਈਥਾਨੋਲ ਬਾਲਣ ‘ਤੇ ਚੱਲਣ ਵਾਲੀ ਕਾਰ ਦਾ ਉਦਘਾਟਨ ਕਰਨਗੇ। ਫਿਲਹਾਲ ਕਾਰ ਦਾ ਵੇਰਵਾ ਸਾਹਮਣੇ ਨਹੀਂ ਆਇਆ ਹੈ, ਪਰ ਜੇਕਰ ਮੀਡੀਆ ਰਿਪੋਰਟਾਂ ਦੀ ਮੰਨੀਏ ਤਾਂ ਇਹ ਟੋਇਟਾ ਦੀ ਇਨੋਵਾ ਜਾਂ ਕੈਮਰੀ ਹੋ ਸਕਦੀ ਹੈ।

ਪੀਟੀਆਈ ਮੁਤਾਬਕ ਗਡਕਰੀ ਨੇ ਦਿੱਲੀ ਵਿੱਚ ਇੱਕ ਸਮਾਗਮ ਵਿੱਚ ਕਿਹਾ, ‘29 ਅਗਸਤ ਨੂੰ ਮੈਂ ਫਲੈਕਸ ਫਿਊਲ ’ਤੇ ਆਧਾਰਿਤ ਟੋਇਟਾ ਦੀ ਕਾਰ ਲਾਂਚ ਕਰਾਂਗਾ। ਇਹ 100% ਬਾਇਓਇਥੇਨੌਲ ‘ਤੇ ਚੱਲਣ ਵਾਲੀ ਕਾਰ ਹੋਵੇਗੀ। ਇਸ ਫਿਊਲ ਨਾਲ ਕਾਰ ਹਾਈਬ੍ਰਿਡ ਸਿਸਟਮ ਲਈ 40 ਫੀਸਦੀ ਬਿਜਲੀ ਪੈਦਾ ਕਰ ਸਕਦੀ ਹੈ। ਉਨ੍ਹਾਂ ਦੱਸਿਆ ਕਿ ਇਹ ਕਾਰ ਦੁਨੀਆ ਦੀ ਪਹਿਲੀ BS6 ਫੇਜ਼-2 ਇਲੈਕਟ੍ਰੀਫਾਈਡ ਫਲੈਕਸ-ਫਿਊਲ ਕਾਰ ਹੋਵੇਗੀ।

ਤੇਲ ਦਰਾਮਦ ‘ਤੇ 16 ਲੱਖ ਕਰੋੜ ਰੁਪਏ ਖਰਚ ਹੁੰਦੇ ਹਨ, ਗਡਕਰੀ ਨੇ ਕਿਹਾ, ‘ਇਸ ਈਂਧਨ ਨਾਲ ਪੈਟਰੋਲੀਅਮ ਦਰਾਮਦ ‘ਤੇ ਹੋਣ ਵਾਲੇ ਖਰਚ ਨੂੰ ਬਚਾਇਆ ਜਾ ਸਕਦਾ ਹੈ। ਜੇਕਰ ਅਸੀਂ ਆਤਮ-ਨਿਰਭਰ ਬਣਨਾ ਹੈ ਤਾਂ ਤੇਲ ਦੀ ਦਰਾਮਦ ਨੂੰ ਜ਼ੀਰੋ ‘ਤੇ ਲਿਆਉਣਾ ਹੋਵੇਗਾ। ਇਸ ਸਮੇਂ ਦੇਸ਼ ਇਸ ‘ਤੇ 16 ਲੱਖ ਕਰੋੜ ਰੁਪਏ ਖਰਚ ਕਰਦਾ ਹੈ, ਜੋ ਕਿ ਸਾਡੀ ਅਰਥਵਿਵਸਥਾ ਲਈ ਵੱਡਾ ਨੁਕਸਾਨ ਹੈ। ਗਡਕਰੀ ਨੇ ਕਿਹਾ, ‘ਈਥਾਨੌਲ ਦੀ ਕੀਮਤ 60 ਰੁਪਏ ਪ੍ਰਤੀ ਲੀਟਰ ਹੈ ਅਤੇ ਇਹ ਕਾਰ 15 ਤੋਂ 20 kmpl ਦੀ ਮਾਈਲੇਜ ਦੇ ਸਕਦੀ ਹੈ। ਇਹ ਇਸ ਨੂੰ ਪੈਟਰੋਲ ਨਾਲੋਂ ਕਿਤੇ ਜ਼ਿਆਦਾ ਕਿਫ਼ਾਇਤੀ ਬਣਾਉਂਦਾ ਹੈ, ਜੋ ਵਰਤਮਾਨ ਵਿੱਚ ਲਗਭਗ 120 ਰੁਪਏ ਪ੍ਰਤੀ ਲੀਟਰ ਹੈ।

ਗਡਕਰੀ ਬਦਲਵੇਂ ਈਂਧਨ ਅਤੇ ਹਰੀ ਊਰਜਾ ‘ਤੇ ਚੱਲਣ ਵਾਲੇ ਵਾਹਨਾਂ ਨੂੰ ਲਗਾਤਾਰ ਉਤਸ਼ਾਹਿਤ ਕਰ ਰਹੇ ਹਨ। ਟੋਇਟਾ ਦੇ ਫਲੈਕਸ-ਫਿਊਲ ਪਾਇਲਟ ਪ੍ਰੋਜੈਕਟ ਨੂੰ ਨਿਤਿਨ ਗਡਕਰੀ ਨੇ ਪਿਛਲੇ ਸਾਲ ਹਰੀ ਝੰਡੀ ਦਿਖਾਈ ਸੀ, ਜਦੋਂ ਕੰਪਨੀ ਨੇ ਟੋਇਟਾ ਕੋਰੋਲਾ ਹਾਈਬ੍ਰਿਡ ਨੂੰ ਪੇਸ਼ ਕੀਤਾ ਸੀ। ਇਸ ਤੋਂ ਬਾਅਦ ਕੇਂਦਰੀ ਮੰਤਰੀ ਨੇ ਹਾਈਡ੍ਰੋਜਨ ਨਾਲ ਚੱਲਣ ਵਾਲੀ ਟੋਇਟਾ ਮਿਰਾਈ ਨੂੰ ਵੀ ਲਾਂਚ ਕੀਤਾ ਸੀ।

ਈਥਾਨੌਲ ਇੱਕ ਕਿਸਮ ਦੀ ਅਲਕੋਹਲ ਹੈ, ਜੋ ਸਟਾਰਚ ਅਤੇ ਖੰਡ ਦੇ ਫਰਮੈਂਟੇਸ਼ਨ ਤੋਂ ਬਣੀ ਹੈ। ਇਸਨੂੰ ਪੈਟਰੋਲ ਵਿੱਚ ਮਿਲਾਇਆ ਜਾਂਦਾ ਹੈ ਅਤੇ ਵਾਹਨਾਂ ਵਿੱਚ ਵਾਤਾਵਰਣ ਅਨੁਕੂਲ ਬਾਲਣ ਵਜੋਂ ਵਰਤਿਆ ਜਾਂਦਾ ਹੈ। ਈਥਾਨੌਲ ਮੁੱਖ ਤੌਰ ‘ਤੇ ਗੰਨੇ ਦੇ ਰਸ ਤੋਂ ਪੈਦਾ ਕੀਤਾ ਜਾਂਦਾ ਹੈ, ਪਰ ਈਥਾਨੌਲ ਸਟਾਰਚ ਵਾਲੀਆਂ ਸਮੱਗਰੀਆਂ ਜਿਵੇਂ ਕਿ ਮੱਕੀ, ਸੜੇ ਆਲੂ, ਕਸਾਵਾ ਅਤੇ ਸੜੀ ਹੋਈ ਸਬਜ਼ੀਆਂ ਤੋਂ ਵੀ ਪੈਦਾ ਕੀਤਾ ਜਾ ਸਕਦਾ ਹੈ।