ਨੀਤੀ ਆਯੋਗ ਦੀ ਸਾਬਕਾ ਕਰਮਚਾਰੀ ਦੀ ਲੰਡਨ ‘ਚ ਸੜਕ ਹਾਦਸੇ ‘ਚ ਮੌਤ, ਉਹ LSE ਤੋਂ ਕਰ ਰਹੀ ਸੀ PhD

ਕੋਚਰ ਦੇ ਪਿਤਾ ਨੇ ਉਸਦੀ ਮੌਤ ਦੀ ਖਬਰ ਆਨਲਾਈਨ ਸਾਂਝੀ ਕੀਤੀ, ਹਾਲਾਂਕਿ, ਮੈਟਰੋਪੋਲੀਟਨ ਪੁਲਿਸ ਨੇ ਅਜੇ ਤੱਕ ਪੀੜਤ ਦੇ ਨਾਮ ਦੀ ਅਧਿਕਾਰਤ ਪੁਸ਼ਟੀ ਨਹੀਂ ਕੀਤੀ ਹੈ।

ਬ੍ਰਿਟੇਨ ਤੋਂ ਇਕ ਦੁੱਖ ਭਰੀ ਖਬਰ ਸਾਹਮਣੇ ਆ ਰਹੀ ਹੈ। ਨੀਤੀ ਆਯੋਗ ਦੀ ਇੱਕ ਸਾਬਕਾ ਕਰਮਚਾਰੀ, ਜੋ ਕਿ ਲੰਡਨ ਸਕੂਲ ਆਫ ਇਕਨਾਮਿਕਸ ਐਂਡ ਪੋਲੀਟਿਕਲ ਸਾਇੰਸ (ਐਲਐਸਈ) ਤੋਂ ਪੀਐਚਡੀ ਕਰ ਰਹੀ ਸੀ, ਦੀ ਲੰਡਨ ਵਿੱਚ ਇੱਕ ਸੜਕ ਹਾਦਸੇ ਵਿੱਚ ਮੌਤ ਹੋ ਗਈ। ਮ੍ਰਿਤਕ ਦਾ ਨਾਂ 33 ਸਾਲਾ ਚੇਸ਼ਠਾ ਕੋਚਰ ਦੱਸਿਆ ਜਾ ਰਿਹਾ ਹੈ। ਚੇਸ਼ਠਾ ਨਾਲ ਇਹ ਹਾਦਸਾ ਉਸ ਸਮੇਂ ਵਾਪਰਿਆ ਜਦੋਂ ਉਹ ਯੂਨੀਵਰਸਿਟੀ ਤੋਂ ਸਾਈਕਲ ’ਤੇ ਘਰ ਪਰਤ ਰਹੀ ਸੀ। ਇਸ ਦੌਰਾਨ ਇਕ ਟਰੱਕ ਨੇ ਉਸ ਨੂੰ ਟੱਕਰ ਮਾਰ ਦਿੱਤੀ।

ਉਹ ਪਿਛਲੇ ਸਾਲ ਹੀ ਗੁਰੂਗ੍ਰਾਮ ਤੋਂ ਲੰਡਨ ਆਈ ਸੀ ਅਤੇ ਉਦੋਂ ਤੋਂ ਹੀ ਵਿਵਹਾਰ ਸੰਬੰਧੀ ਖੋਜ ਕਰ ਰਹੀ ਹੈ। ਕੋਚਰ ਦੇ ਪਿਤਾ ਨੇ ਉਸਦੀ ਮੌਤ ਦੀ ਖਬਰ ਆਨਲਾਈਨ ਸਾਂਝੀ ਕੀਤੀ, ਹਾਲਾਂਕਿ, ਮੈਟਰੋਪੋਲੀਟਨ ਪੁਲਿਸ ਨੇ ਅਜੇ ਤੱਕ ਪੀੜਤ ਦੇ ਨਾਮ ਦੀ ਅਧਿਕਾਰਤ ਪੁਸ਼ਟੀ ਨਹੀਂ ਕੀਤੀ ਹੈ। ਪਤਾ ਲੱਗਾ ਹੈ ਕਿ ਇਹ ਹਾਦਸਾ 19 ਮਾਰਚ ਦੀ ਸ਼ਾਮ ਫਰਿੰਗਡਨ ਰੋਡ ਦੇ ਚੌਰਾਹੇ ਨੇੜੇ ਕਲਰਕਨਵੈਲ ਰੋਡ ‘ਤੇ ਵਾਪਰਿਆ ਸੀ।

ਪੁਲਿਸ ਨੇ ਇੱਕ ਬਿਆਨ ਵਿੱਚ ਕਿਹਾ, “ਇੱਕ 33 ਸਾਲਾ ਔਰਤ ਨੂੰ ਗੰਭੀਰ ਰੂਪ ਵਿੱਚ ਜ਼ਖਮੀ ਪਾਇਆ ਗਿਆ। ਐਮਰਜੈਂਸੀ ਸੇਵਾਵਾਂ ਦੇ ਯਤਨਾਂ ਦੇ ਬਾਵਜੂਦ ਉਸ ਦੀ ਮੌਕੇ ‘ਤੇ ਹੀ ਮੌਤ ਹੋ ਗਈ। ਉਸ ਦੇ ਨਜ਼ਦੀਕੀ ਰਿਸ਼ਤੇਦਾਰਾਂ ਨੂੰ ਸੂਚਿਤ ਕਰ ਦਿੱਤਾ ਗਿਆ ਹੈ।” ਬਿਆਨ ਵਿਚ ਕਿਹਾ ਗਿਆ ਹੈ, “ਲਾਰੀ ਨੂੰ ਮੌਕੇ ‘ਤੇ ਰੋਕਿਆ ਗਿਆ ਸੀ ਅਤੇ ਇਸ ਦਾ ਡਰਾਈਵਰ ਜਾਂਚ ਵਿਚ ਪੁਲਿਸ ਨੂੰ ਸਹਿਯੋਗ ਕਰ ਰਿਹਾ ਹੈ। ਅਜੇ ਤੱਕ ਕੋਈ ਗ੍ਰਿਫਤਾਰੀ ਨਹੀਂ ਹੋਈ ਹੈ ਅਤੇ ਜਾਂਚ ਜਾਰੀ ਹੈ।”

ਅਮਿਤਾਭ ਕਾਂਤ, ਨੀਤੀ ਆਯੋਗ ਦੇ ਸਾਬਕਾ ਮੁੱਖ ਕਾਰਜਕਾਰੀ ਅਧਿਕਾਰੀ (ਸੀ.ਈ.ਓ.) ਨੇ ਪੋਸਟ ਕੀਤਾ, ‘ਉਹ ਇੱਕ ਹੁਸ਼ਿਆਰ ਵਿਦਿਆਰਥੀ ਸੀ। ਪ੍ਰਮਾਤਮਾ ਵਿਛੜੀ ਰੂਹ ਨੂੰ ਆਪਣੇ ਚਰਨਾਂ ਵਿੱਚ ਨਿਵਾਸ ਬਖਸ਼ੇ।” ਆਪਣੇ ਸਾਫਟਵੇਅਰ ਇੰਜੀਨੀਅਰ ਪਤੀ ਪ੍ਰਸ਼ਾਂਤ ਗੌਤਮ ਨਾਲ ਲੰਡਨ ਆਉਣ ਤੋਂ ਪਹਿਲਾਂ ਕੋਚਰ ਨੇ ਪਿਛਲੇ ਸਾਲ ਅਪ੍ਰੈਲ ਤੱਕ ਲਗਭਗ ਦੋ ਸਾਲ ਭਾਰਤ ਦੀ ਨੈਸ਼ਨਲ ਬਿਹੇਵੀਅਰਲ ਇਨਸਾਈਟਸ ਯੂਨਿਟ ਵਿੱਚ ਸੀਨੀਅਰ ਸਲਾਹਕਾਰ ਵਜੋਂ ਕੰਮ ਕੀਤਾ ਸੀ।