ਹਿੰਡਨਬਰਗ ਰਿਪੋਰਟ ਦੇ ਇੱਕ ਸਾਲ ਬਾਅਦ ਅਡਾਨੀ ਨੇ ਕਿਹਾ ਸਾਰੇ ਦੋਸ਼ ਝੂਠੇ ਸਨ ਅਜਿਹਾ ਕਿਸੇ ਹੋਰ ਨਾਲ ਵੀ ਹੋ ਸਕਦਾ ਹੈ

ਅਡਾਨੀ ਗਰੁੱਪ ਦੇ ਚੇਅਰਮੈਨ ਗੌਤਮ ਅਡਾਨੀ ਨੇ ਕਿਹਾ ਕਿ ਇਸ ਤਜ਼ਰਬੇ ਨੇ ਕੰਪਨੀ ਨੂੰ ਅਹਿਮ ਸਬਕ ਸਿਖਾਏ ਹਨ। ਅਡਾਨੀ ਨੇ ਇਹ ਵੀ ਕਿਹਾ ਕਿ ਸਾਡੀਆਂ ਕੰਪਨੀਆਂ ਦੀ ਕਾਰਗੁਜ਼ਾਰੀ ਤੋਂ ਪਤਾ ਲੱਗਦਾ ਹੈ ਕਿ ਦੋਸ਼ ਬੇਬੁਨਿਆਦ ਸਨ।

ਅਡਾਨੀ ਸਮੂਹ ਨੂੰ ਹਿੰਡਨਬਰਗ ਰਿਪੋਰਟ ਤੋਂ ਬਾਅਦ ਕਾਫੀ ਵੱਡਾ ਝਟਕਾ ਲਗਿਆ ਸੀ। ਅਡਾਨੀ ਸਮੂਹ ‘ਤੇ ਹਿੰਡਨਬਰਗ ਰਿਪੋਰਟ ਨੂੰ 24 ਜਨਵਰੀ ਨੂੰ ਇੱਕ ਸਾਲ ਪੂਰਾ ਹੋ ਗਿਆ। ਇਸ ਰਿਪੋਰਟ ਦੇ ਆਉਣ ਤੋਂ ਬਾਅਦ ਕੰਪਨੀ ਦੇ ਜ਼ਿਆਦਾਤਰ ਸ਼ੇਅਰਾਂ ਦੀ ਕੀਮਤ ਅੱਧੇ ਤੋਂ ਵੱਧ ਡਿੱਗ ਗਈ। ਸੰਸਦ ਤੋਂ ਲੈ ਕੇ ਸੜਕਾਂ ਤੱਕ ਹੰਗਾਮਾ ਹੋਇਆ।

ਇਸ ਮੌਕੇ ਅਡਾਨੀ ਗਰੁੱਪ ਦੇ ਚੇਅਰਮੈਨ ਗੌਤਮ ਅਡਾਨੀ ਨੇ ਕਿਹਾ ਕਿ ਇਸ ਤਜ਼ਰਬੇ ਨੇ ਕੰਪਨੀ ਨੂੰ ਅਹਿਮ ਸਬਕ ਸਿਖਾਏ ਹਨ। ਅਡਾਨੀ ਨੇ ਲਿਖਿਆ ਕਿ ਸਾਡੇ ‘ਤੇ ਝੂਠ ਅਤੇ ਬੇਬੁਨਿਆਦ ਦੋਸ਼ ਕੋਈ ਨਵੀਂ ਗੱਲ ਨਹੀਂ ਹੈ। ਇਸ ਲਈ ਵਿਸਤ੍ਰਿਤ ਜਵਾਬ ਜਾਰੀ ਕਰਨ ਤੋਂ ਬਾਅਦ ਮੈਂ ਇਸ ਬਾਰੇ ਹੋਰ ਕੁਝ ਨਹੀਂ ਸੋਚਿਆ।

ਅਡਾਨੀ ਨੇ ਇਹ ਵੀ ਕਿਹਾ ਕਿ ਸਾਡੀਆਂ ਕੰਪਨੀਆਂ ਦੀ ਕਾਰਗੁਜ਼ਾਰੀ ਤੋਂ ਪਤਾ ਲੱਗਦਾ ਹੈ ਕਿ ਦੋਸ਼ ਬੇਬੁਨਿਆਦ ਸਨ। ਮੀਡੀਆ ਦੇ ਕੁਝ ਲੋਕਾਂ ਦੀ ਮਦਦ ਨਾਲ, ਸਾਡੇ ਵਿਰੁੱਧ ਇਹ ਝੂਠ ਇੰਨੇ ਜ਼ੋਰਦਾਰ ਸਨ ਕਿ ਸਾਡੇ ਪੋਰਟਫੋਲੀਓ ਦੀ ਮਾਰਕੀਟ ਕੈਪ ਵਿੱਚ ਕਾਫ਼ੀ ਗਿਰਾਵਟ ਆਈ। ਮੈਨੂੰ ਸਭ ਤੋਂ ਵੱਧ ਚਿੰਤਾ ਇਹ ਸੀ ਕਿ ਹਜ਼ਾਰਾਂ ਛੋਟੇ ਨਿਵੇਸ਼ਕਾਂ ਨੇ ਆਪਣੀ ਬਚਤ ਗੁਆ ਦਿੱਤੀ। ਜੇਕਰ ਸਾਡੇ ਵਿਰੋਧੀਆਂ ਦੀ ਯੋਜਨਾ ਪੂਰੀ ਤਰ੍ਹਾਂ ਕਾਮਯਾਬ ਹੁੰਦੀ ਤਾਂ ਇਸ ਨਾਲ ਵੱਡੀ ਸਮੱਸਿਆ ਪੈਦਾ ਹੋ ਸਕਦੀ ਸੀ।

ਇਸ ਸੰਕਟ ਨਾਲ ਨਜਿੱਠਣ ਲਈ ਕੋਈ ਰੋਡਮੈਪ ਨਹੀਂ ਸੀ। ਸਾਡੇ ਕਾਰੋਬਾਰ ਵਿੱਚ ਵਿਸ਼ਵਾਸ ਨੇ ਸਾਨੂੰ ਇੱਕ ਵੱਖਰਾ ਰਸਤਾ ਲੈਣ ਦੀ ਹਿੰਮਤ ਦਿੱਤੀ। ਸਭ ਤੋਂ ਪਹਿਲਾਂ, 20,000 ਕਰੋੜ ਰੁਪਏ ਦਾ FPO ਲਿਆਉਣ ਤੋਂ ਬਾਅਦ, ਅਸੀਂ ਉਸ ਰਕਮ ਨੂੰ ਵਾਪਸ ਕਰਨ ਦਾ ਫੈਸਲਾ ਕੀਤਾ। ਇਹ ਕਾਰਪੋਰੇਟ ਇਤਿਹਾਸ ਵਿੱਚ ਇੱਕ ਨਵਾਂ ਕਦਮ ਸੀ, ਜੋ ਦਰਸਾਉਂਦਾ ਹੈ ਕਿ ਅਸੀਂ ਨਿਵੇਸ਼ਕਾਂ ਦੇ ਹਿੱਤਾਂ ਅਤੇ ਨੈਤਿਕ ਕਾਰੋਬਾਰ ਬਾਰੇ ਕਿੰਨੇ ਗੰਭੀਰ ਹਾਂ। 4 ਜਨਵਰੀ, 2023 ਨੂੰ, ਹਿੰਡਨਬਰਗ ਰਿਸਰਚ ਨੇ ਅਡਾਨੀ ਸਮੂਹ ‘ਤੇ ਮਨੀ ਲਾਂਡਰਿੰਗ ਤੋਂ ਲੈ ਕੇ ਸ਼ੇਅਰ ਹੇਰਾਫੇਰੀ ਤੱਕ ਦੇ ਦੋਸ਼ ਲਗਾਏ ਸਨ। ਸੁਪਰੀਮ ਕੋਰਟ ਨੇ ਮਾਮਲੇ ਦੀ ਜਾਂਚ ਲਈ 6 ਮੈਂਬਰੀ ਕਮੇਟੀ ਬਣਾਈ ਸੀ। ਇਸ ਤੋਂ ਇਲਾਵਾ ਮਾਰਕੀਟ ਰੈਗੂਲੇਟਰੀ ਸੇਬੀ ਨੂੰ ਵੀ ਜਾਂਚ ਕਰਨ ਲਈ ਕਿਹਾ ਗਿਆ ਸੀ।