PAKISTAN : ਸਾਬਕਾ ਕ੍ਰਿਕਟਰ ਮਿਆਂਦਾਦ ਨੇ ਖੁੱਲ੍ਹ ਕੇ ਕੀਤੀ ਅੱਤਵਾਦੀ ਦਾਊਦ ਦੀ ਤਾਰੀਫ, ਕਿਹਾ ਉਹ ਸਾਡਾ ਰਿਸ਼ਤੇਦਾਰ ਹੈ

ਜਾਵੇਦ ਮਿਆਂਦਾਦ ਨੇ ਕਿਹਾ, ਮੇਰੇ ਲਈ ਬਹੁਤ ਮਾਣ ਵਾਲੀ ਗੱਲ ਹੈ ਕਿ ਦਾਊਦ ਦੀ ਬੇਟੀ ਨੇ ਮੇਰੇ ਬੇਟੇ ਨਾਲ ਵਿਆਹ ਕੀਤਾ ਹੈ। ਮੇਰੀ ਨੂੰਹ ਬਹੁਤ ਪੜ੍ਹੀ-ਲਿਖੀ ਹੈ।

ਮਿਆਂਦਾਦ ਦੀ ਗਿਣਤੀ ਪਾਕਿਸਤਾਨ ਦੇ ਸਭ ਤੋਂ ਵਿਵਾਦਗ੍ਰਸਤ ਖਿਡਾਰੀਆਂ ਵਿਚ ਕੀਤੀ ਜਾਂਦੀ ਹੈ। ਪਾਕਿਸਤਾਨ ਦੇ ਸਾਬਕਾ ਕ੍ਰਿਕਟਰ ਜਾਵੇਦ ਮਿਆਂਦਾਦ ਨੇ ਭਗੌੜੇ ਅੰਡਰਵਰਲਡ ਡਾਨ ਦਾਊਦ ਇਬਰਾਹਿਮ ਦੀ ਤਾਰੀਫ ਕੀਤੀ ਹੈ। ਉਸ ਨੇ ਦੱਸਿਆ ਕਿ ਦਾਊਦ ਇਬਰਾਹਿਮ ਨਾਲ ਪਰਿਵਾਰਕ ਸਬੰਧ ਬਣਾਉਣਾ ਉਸ ਲਈ ਮਾਣ ਵਾਲੀ ਗੱਲ ਹੈ।

ਇਸ ਦੇ ਨਾਲ ਹੀ ਉਨ੍ਹਾਂ ਨੇ ਅੰਡਰਵਰਲਡ ਡੌਨ ਨੂੰ ਅਜਿਹਾ ਵਿਅਕਤੀ ਦੱਸਿਆ ਜਿਸ ਨੇ ਮੁਸਲਮਾਨਾਂ ਦੇ ਹਿੱਤਾਂ ਲਈ ਬਹੁਤ ਕੁਝ ਕੀਤਾ ਹੈ। ਇਕ ਯੂਟਿਊਬ ਚੈਨਲ ‘ਤੇ ਇੰਟਰਵਿਊ ਦੌਰਾਨ ਜਾਵੇਦ ਮਿਆਂਦਾਦ ਨੇ ਕਿਹਾ, “ਮੈਂ ਉਨ੍ਹਾਂ ਨੂੰ ਦੁਬਈ ਤੋਂ ਲੰਬੇ ਸਮੇਂ ਤੋਂ ਜਾਣਦਾ ਹਾਂ। ਇਹ ਮੇਰੇ ਲਈ ਬਹੁਤ ਮਾਣ ਵਾਲੀ ਗੱਲ ਹੈ ਕਿ ਉਨ੍ਹਾਂ ਦੀ ਬੇਟੀ ਨੇ ਮੇਰੇ ਬੇਟੇ ਨਾਲ ਵਿਆਹ ਕੀਤਾ ਹੈ। ਮੇਰੀ ਨੂੰਹ ਬਹੁਤ ਪੜ੍ਹੀ-ਲਿਖੀ ਹੈ। ਉਸਨੇ ਇੱਕ ਕਾਨਵੈਂਟ ਸਕੂਲ ਵਿੱਚ ਪੜ੍ਹਾਈ ਕੀਤੀ ਅਤੇ ਅੱਗੇ ਦੀ ਪੜ੍ਹਾਈ ਲਈ ਇੱਕ ਮਸ਼ਹੂਰ ਯੂਨੀਵਰਸਿਟੀ ਗਈ।”

ਤੁਹਾਨੂੰ ਦੱਸ ਦੇਈਏ ਕਿ ਮਿਆਂਦਾਦ ਦੇ ਬੇਟੇ ਜੁਨੈਦ ਦਾ ਵਿਆਹ ਦਾਊਦ ਇਬਰਾਹਿਮ ਦੀ ਬੇਟੀ ਮਹਰੁਖ ਨਾਲ ਹੋਇਆ ਹੈ। ਦੋਹਾਂ ਦਾ ਵਿਆਹ 2005 ‘ਚ ਦੁਬਈ ‘ਚ ਹੋਇਆ ਸੀ। ਮਿਆਂਦਾਦ ਨੇ ਅੱਗੇ ਕਿਹਾ, “ਲੋਕਾਂ ਨੇ ਦਾਊਦ ਇਬਰਾਹਿਮ ਦੇ ਪਰਿਵਾਰ ਨੂੰ ਲੈ ਕੇ ਗਲਤ ਧਾਰਨਾ ਪੈਦਾ ਕਰ ਦਿੱਤੀ ਹੈ। ਅਸਲ ਦਾਊਦ ਇਬਰਾਹਿਮ ਨੂੰ ਸਮਝਣਾ ਆਸਾਨ ਨਹੀਂ ਹੈ। ਭਾਰਤੀ ਨਾਗਰਿਕ ਦਾਊਦ ਇਬਰਾਹਿਮ ਭਾਰਤ ਵਿੱਚ ਲੋੜੀਂਦਾ ਅੱਤਵਾਦੀ ਹੈ।

ਦਾਊਦ 1993 ਦੇ ਮੁੰਬਈ ਬੰਬ ਧਮਾਕਿਆਂ ਦਾ ਮਾਸਟਰਮਾਈਂਡ ਸੀ, ਜਿਸ ਵਿੱਚ ਲਗਭਗ 250 ਲੋਕ ਮਾਰੇ ਗਏ ਸਨ। ਉਹ ਇੱਕ ਡੀ-ਕੰਪਨੀ ਦਾ ਵੀ ਮਾਲਕ ਹੈ, ਜਿਸਦੀ ਸਥਾਪਨਾ ਉਸਨੇ 1970 ਵਿੱਚ ਮੁੰਬਈ ਵਿੱਚ ਕੀਤੀ ਸੀ। ਮੰਨਿਆ ਜਾ ਰਿਹਾ ਹੈ ਕਿ ਦਾਊਦ ਪਾਕਿਸਤਾਨ ਦੇ ਸਭ ਤੋਂ ਵੱਡੇ ਸ਼ਹਿਰ ਕਰਾਚੀ ਦੇ ਪੌਸ਼ ਕਲਿਫਟਨ ਇਲਾਕੇ ‘ਚ ਰਹਿੰਦਾ ਹੈ। ਹਾਲਾਂਕਿ ਪਾਕਿਸਤਾਨ ਇਸਨੂੰ ਮੰਨਣ ਤੋਂ ਵਾਰ-ਵਾਰ ਇਨਕਾਰ ਕਰਦਾ ਰਿਹਾ ਹੈ।