ਭਾਰਤੀ ਸੈਲਾਨੀਆਂ ਲਈ ਖੁਸ਼ਖਬਰੀ : ਥਾਈਲੈਂਡ ਦਾ 7 ਮਹੀਨਿਆਂ ਦਾ ਆਫਰ, ਬਿਨਾਂ ਵੀਜ਼ਾ ਭਾਰਤੀਆਂ ਨੂੰ ਦੇ ਰਿਹਾ ਸੱਦਾ

ਥਾਈਲੈਂਡ ਸਰਕਾਰ ਨੇ ਕਿਹਾ ਕਿ ਸੈਲਾਨੀਆਂ ਨੂੰ ਆਕਰਸ਼ਿਤ ਕਰਨ ਲਈ ਇਹ ਕਦਮ ਚੁੱਕਿਆ ਗਿਆ ਹੈ। ਥਾਈਲੈਂਡ ਨੇ ਸਤੰਬਰ ਵਿੱਚ ਚੀਨੀ ਸੈਲਾਨੀਆਂ ਲਈ ਵੀਜ਼ਾ ਸ਼ਰਤਾਂ ਰੱਦ ਕਰ ਦਿੱਤੀਆਂ ਸਨ।

ਥਾਈਲੈਂਡ ਤੋਂ ਭਾਰਤ ਲਈ ਇਕ ਚੰਗੀ ਖਬਰ ਸਾਹਮਣੇ ਆ ਰਹੀ ਹੈ। ਥਾਈਲੈਂਡ ਸਰਕਾਰ ਨੇ ਭਾਰਤ ਤੋਂ ਆਉਣ ਵਾਲੇ ਸੈਲਾਨੀਆਂ ਲਈ ਵੀਜ਼ਾ ਦੀ ਸ਼ਰਤ ਖਤਮ ਕਰ ਦਿੱਤੀ ਹੈ। ਸਰਕਾਰੀ ਬੁਲਾਰੇ ਨੇ ਕਿਹਾ ਕਿ ਭਾਰਤੀ ਸੈਲਾਨੀ ਨਵੰਬਰ 2023 ਤੋਂ ਮਈ 2024 ਤੱਕ ਬਿਨਾਂ ਵੀਜ਼ਾ ਦੇ ਥਾਈਲੈਂਡ ਦੀ ਯਾਤਰਾ ਕਰ ਸਕਦੇ ਹਨ।

ਥਾਈਲੈਂਡ ਸਰਕਾਰ ਨੇ ਕਿਹਾ ਕਿ ਸੈਲਾਨੀਆਂ ਨੂੰ ਆਕਰਸ਼ਿਤ ਕਰਨ ਲਈ ਇਹ ਕਦਮ ਚੁੱਕਿਆ ਗਿਆ ਹੈ। ਥਾਈਲੈਂਡ ਨੇ ਸਤੰਬਰ ਵਿੱਚ ਚੀਨੀ ਸੈਲਾਨੀਆਂ ਲਈ ਵੀਜ਼ਾ ਸ਼ਰਤਾਂ ਰੱਦ ਕਰ ਦਿੱਤੀਆਂ ਸਨ। ਕੋਵਿਡ ਤੋਂ ਪਹਿਲਾਂ, ਸਾਲ 2019 ਵਿੱਚ, ਥਾਈਲੈਂਡ ਵਿੱਚ 3 ਕਰੋੜ 90 ਲੱਖ ਸੈਲਾਨੀ ਆਏ ਸਨ। ਇਨ੍ਹਾਂ ਵਿੱਚੋਂ 1 ਕਰੋੜ 10 ਲੱਖ ਚੀਨ ਤੋਂ ਆਏ ਸਨ।

ਥਾਈਲੈਂਡ ਸਰਕਾਰ ਨੇ ਕਿਹਾ ਕਿ ਚੀਨ, ਮਲੇਸ਼ੀਆ ਅਤੇ ਦੱਖਣੀ ਕੋਰੀਆ ਤੋਂ ਬਾਅਦ ਭਾਰਤੀ ਸੈਲਾਨੀ ਦੇਸ਼ ਲਈ ਆਮਦਨ ਦਾ ਸਭ ਤੋਂ ਵੱਡਾ ਸਰੋਤ ਬਣ ਗਏ ਹਨ। ਸਰਕਾਰ ਦੇ ਬੁਲਾਰੇ ਚਾਈ ਵਾਚਰੋਂਕੇ ਨੇ ਕਿਹਾ ‘ਭਾਰਤ ਥਾਈਲੈਂਡ ਲਈ ਆਮਦਨ ਦਾ ਚੌਥਾ ਸਭ ਤੋਂ ਵੱਡਾ ਸਰੋਤ ਬਣ ਕੇ ਉਭਰਿਆ ਹੈ। ਭਾਰਤ ਅਤੇ ਤਾਈਵਾਨ ਤੋਂ ਆਉਣ ਵਾਲੇ ਲੋਕ ਬਿਨਾਂ ਕਿਸੇ ਪਾਬੰਦੀ ਦੇ ਥਾਈਲੈਂਡ ਵਿੱਚ ਦਾਖਲ ਹੋ ਸਕਦੇ ਹਨ ਅਤੇ ਅਗਲੇ 30 ਦਿਨਾਂ ਤੱਕ ਇੱਥੇ ਰਹਿਣ ਦਾ ਅਨੰਦ ਲੈ ਸਕਦੇ ਹਨ।’

ਸਰਕਾਰੀ ਅੰਕੜਿਆਂ ਮੁਤਾਬਕ ਇਸ ਸਾਲ ਭਾਰਤ ਤੋਂ ਕਰੀਬ 12 ਲੱਖ ਸੈਲਾਨੀ ਥਾਈਲੈਂਡ ਆਏ ਹਨ। ਥਾਈਲੈਂਡ ਨੇ ਇਸ ਸਾਲ ਦੇਸ਼ ਵਿੱਚ 28 ਮਿਲੀਅਨ ਸੈਲਾਨੀਆਂ ਦੇ ਆਉਣ ਦਾ ਟੀਚਾ ਰੱਖਿਆ ਹੈ। ਸਰਕਾਰ ਨੇ ਉਮੀਦ ਜਤਾਈ ਹੈ ਕਿ ਸੈਰ-ਸਪਾਟਾ ਲਗਾਤਾਰ ਕਮਜ਼ੋਰ ਹੋ ਰਹੀ ਬਰਾਮਦ ਦੀ ਭਰਪਾਈ ਕਰ ਸਕਦਾ ਹੈ। ਥਾਈਲੈਂਡ ਸਰਕਾਰ ਨੇ ਕਿਹਾ ਕਿ ਵੀਜ਼ਾ ਲੋੜਾਂ ਨੂੰ ਹੋਰ ਸੌਖਾ ਬਣਾਉਣ ਨਾਲ ਹੋਰ ਸੈਲਾਨੀਆਂ ਨੂੰ ਆਕਰਸ਼ਿਤ ਕੀਤਾ ਜਾਵੇਗਾ। ਥਾਈਲੈਂਡ ਨੇ ਇਸ ਸਾਲ ਜਨਵਰੀ ਤੋਂ 29 ਅਕਤੂਬਰ ਤੱਕ 22 ਮਿਲੀਅਨ ਸੈਲਾਨੀਆਂ ਦਾ ਸੁਆਗਤ ਕੀਤਾ, ਨਵੇਂ ਸਰਕਾਰੀ ਅੰਕੜਿਆਂ ਅਨੁਸਾਰ 927.5 ਬਿਲੀਅਨ ਬਾਹਟ ($25.67 ਬਿਲੀਅਨ) ਦੀ ਆਮਦਨ ਪੈਦਾ ਕੀਤੀ ਹੈ।