ਗੁਜਰਾਤ : ਤਨਖ਼ਾਹ ਮੰਗਣ ‘ਤੇ ਨੌਜਵਾਨ ਦੇ ਮੂੰਹ ‘ਚ ਜ਼ਬਰਦਸਤੀ ਜੁੱਤੀ ਪਾ ਦਿੱਤੀ, ਔਰਤ ਕਾਰੋਬਾਰੀ ਦੀ ਕਰਤੂਤ, ਕੇਸ ਦਰਜ

ਪੀੜਤ ਨੇ 16 ਦਿਨ ਕੰਮ ਕਰਨ ਦੇ ਪੈਸੇ ਮੰਗੇ ਤਾਂ ਔਰਤ ਨੇ ਉਸਦੇ ਫੋਨ ਚੁੱਕਣੇ ਬੰਦ ਕਰ ਦਿੱਤੇ। ਜਦੋਂ ਪੀੜਤ ਆਪਣੇ ਭਰਾ ਅਤੇ ਗੁਆਂਢ ਦੇ ਇਕ ਵਿਅਕਤੀ ਨਾਲ ਕੰਪਨੀ ‘ਚ ਪੈਸੇ ਲੈਣ ਗਿਆ ਤਾਂ ਔਰਤ ਦਾ ਭਰਾ ਓਮ ਪ੍ਰਕਾਸ਼ ਆਪਣੇ ਕੁਝ ਸਾਥੀਆਂ ਨਾਲ ਉਥੇ ਆ ਗਿਆ ਅਤੇ ਤਿੰਨਾਂ ਦੀ ਕੁੱਟਮਾਰ ਕਰਨੀ ਸ਼ੁਰੂ ਕਰ ਦਿੱਤੀ।

ਗੁਜਰਾਤ ਤੋਂ ਇਕ ਸ਼ਰਮਨਾਕ ਖਬਰ ਸਾਹਮਣੇ ਆ ਰਹੀ ਹੈ। ਗੁਜਰਾਤ ਦੇ ਮੋਰਬੀ ਸ਼ਹਿਰ ਦੀ ਪੁਲਿਸ ਨੇ 21 ਸਾਲਾ ਵਿਅਕਤੀ ‘ਤੇ ਹਮਲਾ ਕਰਨ ਦੇ ਦੋਸ਼ ‘ਚ ਇਕ ਵਪਾਰੀ ਔਰਤ ਸਮੇਤ ਘੱਟੋ-ਘੱਟ ਛੇ ਹੋਰਾਂ ਖਿਲਾਫ ਮਾਮਲਾ ਦਰਜ ਕੀਤਾ ਹੈ। ਦਰਅਸਲ, ਆਦਮੀ ਉਸ ਔਰਤ ਦੀ ਕੰਪਨੀ ਵਿੱਚ ਕੰਮ ਕਰਦਾ ਸੀ।

ਇਹ ਘਟਨਾ ਬੁੱਧਵਾਰ ਦੀ ਹੈ, ਜਦੋਂ ਔਰਤ ਨੇ ਤਨਖਾਹ ਮੰਗਣ ‘ਤੇ ਉਸ ਵਿਅਕਤੀ ਨੂੰ ਮੂੰਹ ‘ਚ ਜੁੱਤੀ ਫੜ ਕੇ ਮੁਆਫੀ ਮੰਗਣ ਲਈ ਮਜਬੂਰ ਕਰ ਦਿੱਤਾ। ਪੀੜਤ ਨਿਲੇਸ਼ ਦਲਸਾਨੀਆ ਨੇ ਔਰਤ ਖਿਲਾਫ ਮੋਰਬੀ ਸਿਟੀ ਥਾਣੇ ‘ਚ ਸ਼ਿਕਾਇਤ ਦਰਜ ਕਰਵਾਈ ਹੈ। ਔਰਤ ਦੀ ਪਛਾਣ ਵਿਭੂਤੀ ਪਟੇਲ ਉਰਫ ਰਾਣੀਬਾ ਵਜੋਂ ਹੋਈ ਹੈ। ਹੋਰ ਮੁਲਜ਼ਮਾਂ ਵਿੱਚ ਔਰਤ ਦਾ ਭਰਾ ਓਮ ਪ੍ਰਕਾਸ਼ ਅਤੇ ਕੰਪਨੀ ਮੈਨੇਜਰ ਪਰੀਕਸ਼ਿਤ ਵੀ ਸ਼ਾਮਲ ਹਨ।

ਵਿਭੂਤੀ ਪਟੇਲ ਰਾਣੀਬਾ ਇੰਡਸਟਰੀਜ਼ ਪ੍ਰਾਈਵੇਟ ਲਿਮਟਿਡ ਦੀ ਮਾਲਕਿਨ ਹੈ। ਅਕਤੂਬਰ ਦੇ ਸ਼ੁਰੂ ਵਿੱਚ ਉਸ ਨੇ ਇੱਕ ਵਿਅਕਤੀ ਨੂੰ ਕੰਪਨੀ ਵਿੱਚ 12 ਹਜ਼ਾਰ ਰੁਪਏ ਤਨਖਾਹ ’ਤੇ ਨੌਕਰੀ ਦਿੱਤੀ ਸੀ। ਔਰਤ ਨੇ 18 ਅਕਤੂਬਰ ਨੂੰ ਵਿਅਕਤੀ ਨੂੰ ਕੰਪਨੀ ਤੋਂ ਨੌਕਰੀ ਤੋਂ ਕੱਢ ਦਿੱਤਾ ਸੀ। ਇਸ ਤੋਂ ਬਾਅਦ ਜਦੋਂ ਪੀੜਤ ਨੇ 16 ਦਿਨ ਕੰਮ ਕਰਨ ਦੇ ਪੈਸੇ ਮੰਗੇ ਤਾਂ ਔਰਤ ਨੇ ਉਸ ਦੇ ਫੋਨ ਚੁੱਕਣੇ ਬੰਦ ਕਰ ਦਿੱਤੇ। ਜਦੋਂ ਪੀੜਤ ਆਪਣੇ ਭਰਾ ਅਤੇ ਗੁਆਂਢ ਦੇ ਇਕ ਵਿਅਕਤੀ ਨਾਲ ਕੰਪਨੀ ‘ਚ ਪੈਸੇ ਲੈਣ ਗਿਆ ਤਾਂ ਔਰਤ ਦਾ ਭਰਾ ਓਮ ਪ੍ਰਕਾਸ਼ ਆਪਣੇ ਕੁਝ ਸਾਥੀਆਂ ਨਾਲ ਉਥੇ ਆ ਗਿਆ ਅਤੇ ਤਿੰਨਾਂ ਦੀ ਕੁੱਟਮਾਰ ਕਰਨੀ ਸ਼ੁਰੂ ਕਰ ਦਿੱਤੀ।

ਪੀੜਤ ਨੇ ਆਪਣੀ ਸ਼ਿਕਾਇਤ ‘ਚ ਕਿਹਾ ਕਿ ਵਿਭੂਤੀ ਪਟੇਲ ਨੇ ਜ਼ਬਰਦਸਤੀ ਉਸ ਦੇ ਮੂੰਹ ‘ਚ ਜੁੱਤੀ ਪਾ ਕੇ ਮੁਆਫੀ ਮੰਗਣ ਲਈ ਕਿਹਾ। ਉਸ ਨੇ ਪੀੜਤ ਨੂੰ ਜਾਨੋਂ ਮਾਰਨ ਦੀ ਧਮਕੀ ਵੀ ਦਿੱਤੀ। ਇੱਕ ਵੀਡੀਓ ਵਿੱਚ ਪੀੜਤ ਨੂੰ ਔਰਤ ਤੋਂ ਤਨਖ਼ਾਹ ਦੀ ਮੰਗ ਕਰਕੇ ਮੁਆਫ਼ੀ ਮੰਗਣ ਲਈ ਮਜਬੂਰ ਕੀਤਾ ਜਾ ਰਿਹਾ ਹੈ। ਘਰ ਪਰਤਣ ਤੋਂ ਬਾਅਦ ਪੀੜਤ ਨੂੰ ਇਲਾਜ ਲਈ ਹਸਪਤਾਲ ਲਿਜਾਇਆ ਗਿਆ। ਜਿੱਥੇ ਉਸਦਾ ਇਲਾਜ ਚੱਲ ਰਿਹਾ ਹੈ। ਸਾਰੇ ਮੁਲਜ਼ਮਾਂ ਖ਼ਿਲਾਫ਼ ਐਸਸੀ/ਐਸਟੀ (ਅੱਤਿਆਚਾਰ ਰੋਕੂ) ਐਕਟ ਦੀਆਂ ਵੱਖ-ਵੱਖ ਧਾਰਾਵਾਂ ਤਹਿਤ ਕੇਸ ਦਰਜ ਕੀਤਾ ਗਿਆ ਹੈ। ਫਿਲਹਾਲ ਇਸ ਮਾਮਲੇ ਦੀ ਜਾਂਚ ਚੱਲ ਰਹੀ ਹੈ ਅਤੇ ਅਜੇ ਤੱਕ ਕਿਸੇ ਦੀ ਗ੍ਰਿਫਤਾਰੀ ਨਹੀਂ ਹੋਈ ਹੈ।