ਗਾਜ਼ਾ ‘ਚ ਲਗਾਤਾਰ ਬੰਬਾਰੀ ਕਾਰਨ ਧੂੜ ਅਤੇ ਧੂੰਆਂ, ਪਰ ਉੱਥੇ ਦੀ ਹਵਾ ਵੀ ਦਿੱਲੀ ਨਾਲੋਂ 10 ਗੁਣਾ ਜ਼ਿਆਦਾ ਸਾਫ਼

ਫ਼ਿਲਸਤੀਨੀ ਅਧਿਕਾਰੀਆਂ ਨੇ ਦੱਸਿਆ ਕਿ ਗਾਜ਼ਾ ‘ਤੇ 18 ਹਜ਼ਾਰ ਟਨ ਬੰਬ ਸੁੱਟੇ ਗਏ ਹਨ, ਯਾਨੀ ਗਾਜ਼ਾ ‘ਤੇ ਹਰ ਰੋਜ਼ 600 ਟਨ ਬੰਬ ਸੁੱਟੇ ਗਏ ਹਨ। ਗਾਜ਼ਾ ‘ਚ ਇੰਨੀ ਜ਼ਿਆਦਾ ਬੰਬਾਰੀ ਅਤੇ ਰਾਕੇਟ ਫਾਇਰਿੰਗ ਦੇ ਬਾਵਜੂਦ ਉੱਥੋਂ ਦੀ ਹਵਾ ਦਿੱਲੀ ਦੀ ਹਵਾ ਨਾਲੋਂ 10 ਗੁਣਾ ਜ਼ਿਆਦਾ ਸਾਫ਼ ਹੈ।

ਹਮਾਸ ਵਲੋਂ ਇਜ਼ਰਾਈਲ ‘ਤੇ ਕੀਤੇ ਗਏ ਹਮਲੇ ਨੇ ਪੂਰੀ ਦੁਨੀਆਂ ਨੂੰ ਹਿਲਾ ਕੇ ਰੱਖ ਦਿਤਾ ਸੀ। ਇਜ਼ਰਾਈਲ ਅਤੇ ਹਮਾਸ ਵਿਚਾਲੇ ਹੁਣ ਜ਼ਬਰਦਸਤ ਜੰਗ ਜਾਰੀ ਹੈ। ਇਜ਼ਰਾਈਲ ਗਾਜ਼ਾ ਪੱਟੀ ‘ਤੇ ਲਗਾਤਾਰ ਹਮਲੇ ਕਰ ਰਿਹਾ ਹੈ। ਲਗਾਤਾਰ ਬੰਬਾਰੀ ਕਾਰਨ ਧੂੰਆਂ ਫੈਲ ਰਿਹਾ ਹੈ, ਜਦਕਿ ਕਈ ਇਮਾਰਤਾਂ ਜ਼ਮੀਨ ‘ਚ ਧੱਸ ਗਈਆਂ ਹਨ ਅਤੇ ਇਨ੍ਹਾਂ ਇਮਾਰਤਾਂ ਦਾ ਮਲਬਾ ਚਾਰੇ ਪਾਸੇ ਫੈਲਿਆ ਹੋਇਆ ਹੈ।

ਜਦੋਂ ਵੀ ਬੰਬਾਰੀ ਕਰਕੇ ਇਮਾਰਤਾਂ ਨੂੰ ਢਹਿ ਢੇਰੀ ਕੀਤਾ ਜਾਂਦਾ ਹੈ ਤਾਂ ਆਲੇ-ਦੁਆਲੇ ਦੇ ਖੇਤਰਾਂ ਵਿੱਚ ਭਿਆਨਕ ਪ੍ਰਦੂਸ਼ਣ ਹੁੰਦਾ ਹੈ। ਇਸ ਦੇ ਨਾਲ ਹੀ ਅੱਗ ਜਾਂ ਬੰਬਾਰੀ ਦਾ ਧੂੰਆਂ ਵੀ ਵੱਡੇ ਪੱਧਰ ‘ਤੇ ਫੈਲਦਾ ਹੈ। ਇਸ ਦੇ ਬਾਵਜੂਦ ਗਾਜ਼ਾ ਦੀ ਹਵਾ ਇਸ ਵੇਲੇ ਪ੍ਰਦੂਸ਼ਿਤ ਦਿੱਲੀ ਨਾਲੋਂ 10 ਗੁਣਾ ਸਾਫ਼ ਹੈ।

ਮੀਡੀਆ ਰਿਪੋਰਟਾਂ ਮੁਤਾਬਕ ਵੈੱਬਸਾਈਟ aqicn.org ਮੁਤਾਬਕ ਜਿਹੜੇ ਇਲਾਕੇ ਜੰਗ ਦੇ ਕੇਂਦਰ ‘ਚ ਰਹੇ ਹਨ, ਉਨ੍ਹਾਂ ‘ਚ ਅਸ਼ਕੇਲੋਨ, ਸੇਦਰੋਟ, ਅਸ਼ਦੋਦ ਵਰਗੇ ਕਈ ਇਲਾਕੇ ਸ਼ਾਮਲ ਹਨ। ਇਨ੍ਹਾਂ ਇਲਾਕਿਆਂ ‘ਚ ਭਾਰੀ ਬੰਬਾਰੀ ਹੋਈ ਹੈ। ਇਸ ਕਾਰਨ ਇਨ੍ਹਾਂ ਇਲਾਕਿਆਂ ਵਿੱਚ ਧੂੰਆਂ ਅਤੇ ਮਲਬਾ ਪ੍ਰਦੂਸ਼ਣ ਹੈ। ਪਰ ਇਸ ਦੇ ਬਾਵਜੂਦ ਇਨ੍ਹਾਂ ਇਲਾਕਿਆਂ ਦੀ ਹਵਾ ਬਹੁਤ ਸਾਫ਼ ਹੈ। ਇੱਥੇ ਏਅਰ ਕੁਆਲਿਟੀ ਇੰਡੈਕਸ (AQI) 60 ਤੋਂ 80 ਦੇ ਵਿਚਕਾਰ ਦਰਜ ਕੀਤਾ ਗਿਆ ਸੀ।

ਸਭ ਤੋਂ ਸਾਫ਼ ਹਵਾ ਸੇਡਰੋਟ ਵਿੱਚ ਹੈ, ਜਿੱਥੇ AQI 12 ਦਰਜ ਕੀਤਾ ਗਿਆ ਹੈ। IDF ਦੁਆਰਾ ਹਾਲ ਹੀ ਵਿੱਚ ਜਾਰੀ ਕੀਤੇ ਗਏ ਅੰਕੜਿਆਂ ਦੇ ਅਨੁਸਾਰ, ਇਜ਼ਰਾਈਲੀ ਫੌਜ ਨੇ ਗਾਜ਼ਾ ਪੱਟੀ ਵਿੱਚ 12 ਹਜ਼ਾਰ ਟੀਚਿਆਂ ‘ਤੇ ਹਮਲੇ ਕੀਤੇ ਹਨ। ਹਾਲਾਂਕਿ ਕਿੰਨੀਆਂ ਇਮਾਰਤਾਂ ਢਹਿ ਗਈਆਂ ਹਨ, ਇਸ ਬਾਰੇ ਕੋਈ ਜਾਣਕਾਰੀ ਨਹੀਂ ਦਿੱਤੀ ਗਈ ਹੈ। ਹਾਲਾਂਕਿ ਬੰਬਾਂ ਦੀ ਕੁੱਲ ਗਿਣਤੀ ਤੋਂ ਇਸ ਦਾ ਅੰਦਾਜ਼ਾ ਲਗਾਇਆ ਜਾ ਸਕਦਾ ਹੈ।

ਫ਼ਿਲਸਤੀਨੀ ਅਧਿਕਾਰੀਆਂ ਨੇ ਦੱਸਿਆ ਕਿ ਗਾਜ਼ਾ ‘ਤੇ 18 ਹਜ਼ਾਰ ਟਨ ਬੰਬ ਸੁੱਟੇ ਗਏ ਹਨ, ਯਾਨੀ ਗਾਜ਼ਾ ‘ਤੇ ਹਰ ਰੋਜ਼ 600 ਟਨ ਬੰਬ ਸੁੱਟੇ ਗਏ ਹਨ। ਗਾਜ਼ਾ ‘ਚ ਇੰਨੀ ਜ਼ਿਆਦਾ ਬੰਬਾਰੀ ਅਤੇ ਰਾਕੇਟ ਫਾਇਰਿੰਗ ਦੇ ਬਾਵਜੂਦ ਉੱਥੋਂ ਦੀ ਹਵਾ ਦਿੱਲੀ ਦੀ ਹਵਾ ਨਾਲੋਂ 10 ਗੁਣਾ ਜ਼ਿਆਦਾ ਸਾਫ਼ ਹੈ। ਰਾਜਧਾਨੀ ਦਿੱਲੀ ਦੇ ਕਈ ਇਲਾਕਿਆਂ ‘ਚ AQI 550 ਤੱਕ ਪਹੁੰਚ ਗਿਆ ਹੈ। ਦਿੱਲੀ ਅਤੇ ਰਾਸ਼ਟਰੀ ਰਾਜਧਾਨੀ ਖੇਤਰ ਵਿੱਚ ਜਿੱਥੇ ਗੈਸ ਚੈਂਬਰ ਬਣ ਗਏ ਹਨ, ਉਥੇ AQI 300 ਤੋਂ 800 ਦੇ ਵਿਚਕਾਰ ਦਰਜ ਕੀਤਾ ਗਿਆ ਹੈ। ਦਿੱਲੀ ਅਤੇ ਐਨਸੀਆਰ ਵਿੱਚ ਪਿਛਲੇ 5 ਦਿਨਾਂ ਤੋਂ ਧੂੰਏਂ ਦੀ ਚਾਦਰ ਛਾਈ ਹੋਈ ਹੈ।