ਡੇਰੇ ‘ਚ ਗਾਣੇ ਗਾਉਣ ਦੇ ਬਿਆਨ ਨੂੰ ਲੈ ਕੇ ਜਸਬੀਰ ਜੱਸੀ ਤੇ ਹੰਸ ਰਾਜ ਹੰਸ ਵਿਚਾਲੇ ਸੋਸ਼ਲ ਮੀਡੀਆ ‘ਤੇ ਛਿੜੀ ਜੰਗ

ਹੰਸਰਾਜ ਹੰਸ ਦੇ ਬਿਆਨ ਤੋਂ ਬਾਅਦ ਜੱਸੀ ਨੇ ਟਿੱਪਣੀ ਕੀਤੀ ਅਤੇ ਲਿਖਿਆ, ”ਹੰਸਰਾਜ ਹੰਸ ਜੀ ਕੁਦਰਤ ਦੁਆਰਾ ਬਖਸ਼ੇ ਇੱਕ ਮਹਾਨ ਕਲਾਕਾਰ ਹਨ। ਭਾਜੀ ਨੇ ਰਾਜਨੀਤੀ ਵਿੱਚ ਆ ਕੇ ਆਪਣਾ ਅਤੇ ਮਿਊਜ਼ਿਕ ਇੰਡਸਟਰੀ ਨੂੰ ਬਹੁਤ ਵੱਡਾ ਨੁਕਸਾਨ ਪਹੁੰਚਾਇਆ ਹੈ। ਭਾਜੀ ਸਿਰਫ ਗਾਉਣ ਅਤੇ ਲੋਕਾਂ ਨੂੰ ਗਾਣਾ ਸਿਖਾਉਣ।”

ਜਸਬੀਰ ਜੱਸੀ ਨੇ ਪਿੱਛਲੇ ਦਿਨੀ ਇਕ ਇੰਟਰਵਿਊ ਵਿਚ ਡੇਰੇ ‘ਚ ਗਾਉਣ ਵਾਲਿਆਂ ਦੀ ਆਲੋਚਨਾ ਕੀਤੀ ਸੀ। ਡੇਰੇ ‘ਚ ਗਾਉਣ ਦੇ ਬਿਆਨ ਨੂੰ ਲੈ ਕੇ ਪੰਜਾਬੀ ਗਾਇਕ ਜਸਬੀਰ ਜੱਸੀ ਅਤੇ ਹੰਸਰਾਜ ਹੰਸ ਵਿਚਾਲੇ ਸੋਸ਼ਲ ਮੀਡੀਆ ‘ਤੇ ਜੰਗ ਛਿੜ ਗਈ ਹੈ। ਜਸਬੀਰ ਜੱਸੀ ਨੇ ਸੋਸ਼ਲ ਮੀਡੀਆ ‘ਤੇ ਵਾਰ-ਵਾਰ ਡੇਰਿਆਂ ‘ਚ ਨਾ ਜਾਣ ਅਤੇ ਗਾਉਣ ਦੀ ਗੱਲ ਕੀਤੀ ਅਤੇ ਅਜਿਹਾ ਕਰਨ ਵਾਲਿਆਂ ਦਾ ਵਿਰੋਧ ਕੀਤਾ।

ਗਾਇਕ ਹੰਸਰਾਜ ਹੰਸ ਨੇ ਆਪਣੇ ਇੱਕ ਤਾਜ਼ਾ ਇੰਟਰਵਿਊ ਦੌਰਾਨ ਜਦੋਂ ਪੱਤਰਕਾਰ ਨੇ ਉਨ੍ਹਾਂ ਨੂੰ ਜਸਬੀਰ ਜੱਸੀ ਵੱਲੋਂ ਡੇਰਿਆਂ ਬਾਰੇ ਦਿੱਤੇ ਬਿਆਨ ਬਾਰੇ ਪੁੱਛਿਆ ਤਾਂ ਉਨ੍ਹਾਂ ਜਸਬੀਰ ਜੱਸੀ ਨੂੰ ਨਸੀਹਤ ਦਿੰਦਿਆਂ ਤਿੱਖਾ ਜਵਾਬ ਦਿੱਤਾ। ਹੰਸ ਨੇ ਕਿਹਾ, ”ਮੈਂ ਖੁਦ ਉਸ (ਜੱਸੀ) ਨੂੰ ਸਮਝਾਵਾਂਗਾ ਕਿ ਪੁੱਤਰ, ਬੋਲਣ ਤੋਂ ਪਹਿਲਾਂ ਸੋਚੋ। ਜੇਕਰ ਕੋਈ ਤੁਹਾਨੂੰ ਦਰਗਾਹ ‘ਤੇ ਜਾ ਕੇ ਗਾਉਣ ਲਈ ਕਹੇ, ਤਾਂ ਤੁਸੀਂ ਕਹਿੰਦੇ ਹੋ ਕਿ ਮੈਂ ਉੱਥੇ ਜਾ ਕੇ ਨਹੀਂ ਗਾਉਣਾ। ਜਦੋਂ ਅੱਜ ਤੱਕ ਤੈਨੂੰ ਕਿਸੇ ਨੇ ਬੁਲਾਇਆ ਨਹੀਂ ਤੇ ਤੂੰ ਘਰ ਬੈਠ ਕੇ ਆਖਦਾ ਹੈ । ਵੱਡੇ ਘਰਾਂ ਵਿੱਚ ਵਿਆਹ ਹੋ ਰਹੇ ਹਨ, ਮੈਂ ਉਥੇ ਨਹੀਂ ਜਾਵਾਂਗਾ, ਉਨ੍ਹਾਂ ਨੇ ਤੈਨੂੰ ਬੁਲਾਇਆ ਹੀ ਨਹੀਂ।” ਹੰਸ ਨੇ ਕਿਹਾ ਕਿ ਘਰ ਬੈਠ ਕੇ ਮੈਂ ਵੀ ਫੈਸਲਾ ਕਰ ਸਕਦਾ ਹਾਂ। ਮੈਨੂੰ ਯਕੀਨ ਹੈ ਕਿ ਮੈਂ ਨਹੀਂ ਗਾਵਾਂਗਾ, ਪਰ ਜੇ ਕੋਈ ਨਾ ਬੁਲਾਵੇ ਤਾਂ ਗਾਉਣਾ ਕਿੱਥੇ ਹੈ?

ਜੱਸੀ ਬਾਈਕਾਟ ਕਿਵੇਂ ਕਰ ਸਕਦਾ ਹੈ, ਜਦੋਂ ਉਸਨੂੰ ਕਿਸੇ ਨੇ ਡੇਰੇ ਵਿੱਚ ਬੁਲਾਇਆ ਹੀ ਨਹੀਂ। ਹੰਸ ਦੀ ਇਹ ਇੰਟਰਵਿਊ ਜਦੋਂ ਇਕ ਮੀਡਿਆ ਚੈਨਲ ਵੱਲੋਂ ਪ੍ਰਸਾਰਿਤ ਕੀਤੀ ਗਈ ਤਾਂ ਚੱਲ ਰਹੀ ਇੰਟਰਵਿਊ ਦੇ ਵਿਚਕਾਰ ਗਾਇਕ ਜਸਬੀਰ ਜੱਸੀ ਨੇ ਵੀ ਸੋਸ਼ਲ ਮੀਡੀਆ ‘ਤੇ ਕੁਮੈਂਟ ਕਰਕੇ ਹੰਸਰਾਜ ਹੰਸ ਦੀਆਂ ਗੱਲਾਂ ਦਾ ਜਵਾਬ ਦਿੱਤਾ।

ਜੱਸੀ ਨੇ ਟਿੱਪਣੀ ਕੀਤੀ ਅਤੇ ਲਿਖਿਆ, “ਹੰਸਰਾਜ ਹੰਸ ਜੀ ਕੁਦਰਤ ਦੁਆਰਾ ਬਖਸ਼ੇ ਇੱਕ ਮਹਾਨ ਕਲਾਕਾਰ ਹਨ। ਭਾਜੀ ਨੇ ਰਾਜਨੀਤੀ ਵਿੱਚ ਆ ਕੇ ਆਪਣਾ ਅਤੇ ਮਿਊਜ਼ਿਕ ਇੰਡਸਟਰੀ ਨੂੰ ਬਹੁਤ ਵੱਡਾ ਨੁਕਸਾਨ ਪਹੁੰਚਾਇਆ ਹੈ। ਭਾਜੀ ਸਿਰਫ ਗਾਉਣ ਅਤੇ ਲੋਕਾਂ ਨੂੰ ਸਿਖਾਉਣ। ਹੁਣ ਦੇਖਣਾ ਇਹ ਹੈ ਕਿ ਸੋਸ਼ਲ ਮੀਡੀਆ ‘ਤੇ ਦੋਵਾਂ ਕਲਾਕਾਰਾਂ ਦੀ ਇਹ ਜੰਗ ਕੀ ਰੂਪ ਧਾਰਨ ਕਰਦੀ ਹੈ। ਹਾਲਾਂਕਿ ਜੱਸੀ ਅਨੁਸਾਰ ਉਹ ਅਜੇ ਵੀ ਆਪਣੇ ਡੇਰੇ ਦੇ ਬਿਆਨ ‘ਤੇ ਕਾਇਮ ਹੈ, ਦੂਜੇ ਪਾਸੇ ਹੰਸਰਾਜ ਹੰਸ ਖੁਦ ਗਾਇਕ ਹੋਣ ਦੇ ਨਾਲ-ਨਾਲ ਨਕੋਦਰ ਸਥਿਤ ਡੇਰਾ ਬਾਪੂ ਲਾਲ ਬਾਦਸ਼ਾਹ ਦਾ ਮੁੱਖ ਸੇਵਾਦਾਰ ਵੀ ਹੈ।