USA : ਭਾਰਤੀ ਮੂਲ ਦੇ ਮੈਨੇਜਰ ‘ਤੇ ਫੁੱਟਬਾਲ ਟੀਮ ਦੇ 20 ਮਿਲੀਅਨ ਡਾਲਰ ਚੋਰੀ ਕਰਨ ਅਤੇ ਲਗਜ਼ਰੀ ਕਾਰਾਂ ਖਰੀਦਣ ਦਾ ਦੋਸ਼

ਮੁਲਜ਼ਮ ਨੇ ਫੁੱਟਬਾਲ ਕਲੱਬ ਦੇ ਪੈਸਿਆਂ ਨਾਲ ਆਪਣੇ ਲਈ ਲਗਜ਼ਰੀ ਕਾਰਾਂ ਅਤੇ ਹੋਰ ਸਾਮਾਨ ਖਰੀਦ ਕੇ ਧੋਖਾਧੜੀ ਕੀਤੀ। ਮੁਲਜ਼ਮ ਦੀ ਪਛਾਣ ਅਮਿਤ ਪਟੇਲ ਵਜੋਂ ਹੋਈ ਹੈ, ਜੋ ਅਮਰੀਕਾ ਦੇ ਜੈਕਸਨਵਿਲੇ ਜੈਗੁਆਰਜ਼ ਫੁੱਟਬਾਲ ਕਲੱਬ ਦਾ ਵਿੱਤੀ ਮੈਨੇਜਰ ਸੀ।

ਅਮਰੀਕਾ ਵਿਚ ਭਾਰਤੀ ਮੂਲ ਦੇ ਇਕ ਮੈਨੇਜਰ ਵਲੋਂ ਕੀਤੀ ਗਈ ਧੋਖਾਧੜੀ ਦਾ ਮਾਮਲਾ ਸਾਹਮਣੇ ਆ ਰਿਹਾ ਹੈ। ਅਮਰੀਕਾ ਵਿਚ ਭਾਰਤੀ ਮੂਲ ਦੇ ਇਕ ਮੈਨੇਜਰ ‘ਤੇ ਇਕ ਅਮਰੀਕੀ ਫੁੱਟਬਾਲ ਕਲੱਬ ਨੂੰ 22 ਮਿਲੀਅਨ ਡਾਲਰ ਦੀ ਧੋਖਾਧੜੀ ਕਰਨ ਦਾ ਦੋਸ਼ ਲੱਗਾ ਹੈ। ਇਲਜ਼ਾਮ ਹੈ ਕਿ ਮੈਨੇਜਰ ਨੇ ਆਪਣੇ ਹਿੱਤਾਂ ਦੀ ਪੂਰਤੀ ਲਈ ਫੁੱਟਬਾਲ ਕਲੱਬ ਤੋਂ ਲੱਖਾਂ ਡਾਲਰ ਦੀ ਠੱਗੀ ਮਾਰੀ ਹੈ।

ਮੁਲਜ਼ਮ ਨੇ ਫੁੱਟਬਾਲ ਕਲੱਬ ਦੇ ਪੈਸਿਆਂ ਨਾਲ ਆਪਣੇ ਲਈ ਲਗਜ਼ਰੀ ਕਾਰਾਂ ਅਤੇ ਹੋਰ ਸਾਮਾਨ ਖਰੀਦ ਕੇ ਧੋਖਾਧੜੀ ਕੀਤੀ। ਮੁਲਜ਼ਮ ਦੀ ਪਛਾਣ ਅਮਿਤ ਪਟੇਲ ਵਜੋਂ ਹੋਈ ਹੈ, ਜੋ ਅਮਰੀਕਾ ਦੇ ਜੈਕਸਨਵਿਲੇ ਜੈਗੁਆਰਜ਼ ਫੁੱਟਬਾਲ ਕਲੱਬ ਦਾ ਵਿੱਤੀ ਮੈਨੇਜਰ ਸੀ। ਅਮਿਤ ਪਟੇਲ 2018 ਵਿੱਚ ਫੁੱਟਬਾਲ ਕਲੱਬ ਦੇ ਵਿੱਤੀ ਮੈਨੇਜਰ ਬਣੇ ਅਤੇ ਅਗਲੇ ਪੰਜ ਸਾਲਾਂ ਤੱਕ ਇਸ ਅਹੁਦੇ ‘ਤੇ ਰਹੇ। ਇਸ ਸਾਲ ਫਰਵਰੀ ਵਿੱਚ ਕਲੱਬ ਨੇ ਮੁਲਜ਼ਮ ਨੂੰ ਨੌਕਰੀ ਤੋਂ ਕੱਢ ਦਿੱਤਾ ਸੀ।

ਜੈਕਸਨਵਿਲੇ ਜ਼ਿਲ੍ਹਾ ਅਦਾਲਤ ਵਿੱਚ ਦਾਇਰ ਦਸਤਾਵੇਜ਼ਾਂ ਦੇ ਅਨੁਸਾਰ, ਅਮਿਤ ਪਟੇਲ ‘ਤੇ ਕਲੱਬ ਦਾ ਇਕਲੌਤਾ ਪ੍ਰਸ਼ਾਸਕ ਹੋਣ ਅਤੇ ਟੀਮ ਲਈ ਵਪਾਰਕ ਮਾਲ ਖਰੀਦਣ ਲਈ ਵਰਚੁਅਲ ਕ੍ਰੈਡਿਟ ਕਾਰਡ ਪ੍ਰੋਗਰਾਮ ਦੀ ਵਰਤੋਂ ਕਰਕੇ ਨਿੱਜੀ ਖਰੀਦਦਾਰੀ ਕਰਨ ਦਾ ਦੋਸ਼ ਹੈ। ਕਲੱਬ ਦੇ ਪੈਸਿਆਂ ਨਾਲ, ਪਟੇਲ ਨੇ ਆਪਣੇ ਲਈ ਇੱਕ ਟੇਸਲਾ ਮਾਡਲ 3 ਸੇਡਾਨ ਕਾਰ, ਇੱਕ ਨਿਸਾਨ ਪਿਕਅੱਪ ਟਰੱਕ, $95 ਹਜ਼ਾਰ ਦੀ ਇੱਕ ਲਗਜ਼ਰੀ ਘੜੀ ਅਤੇ ਨਿਵੇਸ਼ ਲਈ ਕ੍ਰਿਪਟੋਕੁਰੰਸੀ ਖਰੀਦੀ। ਐਫਬੀਆਈ ਇਸ ਮਾਮਲੇ ਦੀ ਜਾਂਚ ਕਰ ਰਹੀ ਸੀ।

ਮੀਡੀਆ ਰਿਪੋਰਟਾਂ ਮੁਤਾਬਕ ਦੋਸ਼ੀ ਦੇ ਵਕੀਲ ਐਲੇਕਸ ਕਿੰਗ ਨੇ ਕਿਹਾ ਹੈ ਕਿ ਉਨ੍ਹਾਂ ਦਾ ਮੁਵੱਕਿਲ ਆਪਣੇ ਕੀਤੇ ‘ਤੇ ਸ਼ਰਮਿੰਦਾ ਹੈ ਅਤੇ ਆਪਣੇ ਕੀਤੇ ਲਈ ਮੁਆਫੀ ਮੰਗਦਾ ਹੈ। ਵਕੀਲ ਨੇ ਦੱਸਿਆ ਕਿ ਪਟੇਲ ਜੂਆ ਖੇਡਣ ਦਾ ਆਦੀ ਹੈ ਅਤੇ ਉਸ ਨੂੰ ਜੂਏ ਦਾ ਆਦੀ ਹੋਣ ਕਾਰਨ ਉਸਨੇ ਕਲੱਬ ਨਾਲ ਧੋਖਾਧੜੀ ਕੀਤੀ ਅਤੇ ਫੁੱਟਬਾਲ ਕਲੱਬ ਦੇ ਪੈਸੇ ਜੂਏ ਵਿੱਚ ਹਾਰੀ ਹੋਈ ਰਕਮ ਨੂੰ ਮੋੜਨ ਲਈ ਵਰਤ ਲਏ ਸਨ।